Friday, 09 December 2022 | Login
મોરપીંછ.કોમ - મોરપીંછ.કોમ
મોરપીંછ.કોમ

મોરપીંછ.કોમ

મુખ્‍ય મંત્રી શ્રી નરેન્‍દ્રભાઇ મોદીએ સ્‍વર્ણિમ ગુજરાત સંસદીય સંકલ્‍પ પરિષદનો પ્રસ્‍તાવ ગુજરાત વિધાનસભામાં રજૂ કરતા, ર૧મી સદીમાં આખું વિશ્વ ગુજરાતને પોતાનું ‘ઘર' બનાવે તેવા મહત્ત્વાકાંક્ષી સંકલ્‍પ પાર પાડવા માટે, ગુજરાતના સૌ વર્તમાન અને પૂર્વ જનપ્રતિનિધિઓ પોતાના અનુભવી માર્ગદર્શન, પ્રભાવ અને નેતૃત્‍વ દ્વારા સમાજને ‘સુરાજ્‍ય'ની દિશામાં લઇ જવા આહ્‌વાન કર્યું હતું.
 
પ્રસ્‍તાવની ભૂમિકા રજૂ કરતાં શ્રી નરેન્‍દ્રભાઈ મોદીએ ર૦૧૦ના નવા વર્ષની શુભકામના આપી હતી અને જણાવ્‍યું કે, ગુજરાતનું સુવર્ણ જયંતિ વર્ષ ૧લી મે, ર૦૧૦થી શરૂ થવાનું છે ત્‍યારે આજની આ વિધાનસભામાં ૧૯૬૦થી ગુજરાત માટે જેમણે જેમણે યોગદાન આપ્‍યું છે, ગુજરાતને વિકસીત બનાવવા માટેનો મજબૂત પાયો નાંખ્‍યો છે, જેમણે પોતાની જવાબદારીથી જાહેરજીવનને ઉજ્જવળ બનાવ્‍યું છે અને શોભા આપી છે તેવા પૂર્વ અને વર્તમાન જનપ્રતિનિધિઓ સુવર્ણ જયંતિ વર્ષના અવસર માટેની સફળતાની ભાવના સાથે આ વિધાનગૃહમાં સંકલ્‍પબદ્ધ થવા એકત્ર થયા તે માટે તેઓ સૌનો આભાર માને છે.
 
મુખ્‍ય મંત્રીશ્રીએ જણાવ્‍યું કે, ગુજરાતની પ્રગતિ આજે દેખાય છે તેના પાયામાં ગયા પ૦ વર્ષો સુધીના આપ સૌના સહિયારા પુરૂષાર્થ અને પરિશ્રમનો પરિપાક છે. કોઇ વ્‍યક્‍તિ કે સરકાર દુનિયા બદલી શકતી નથી, સહુની ઉત્તમ ભાવનાથી, અનુભવોના માર્ગદર્શન સાથે આપણે ગુજરાતની આવતીકાલના સમાજને ઘડવાનો અવસર ઉજવવો છે. જે સારું છે તેને વધુ સારું બનાવીએ, જે ઉત્તમ છે તેને સાથે લઇને વધુ ગતિશીલ વિકાસ તરફ સંકલ્‍પમય થઇએ.
 
તેમણે એમ પણ જણાવ્‍યું કે, નર્મદા યોજનામાં કોઇ શ્રમજીવનું પાયાના પથ્‍થર તરીકેનું શ્રમદાન હોય કે ખેડૂત-મજદૂર કાળી મજૂરી કરીને પરસેવો પાડયો છે એવા કેટકેટલા પરિશ્રમ, પુરૂષાર્થના પરિણામે જ આપણે ગુજરાતને ગૌરવરૂપ બનાવ્‍યું છે. આ જનતા જનાર્દનની શક્‍તિને કંઇક આપવાનો અવસર એટલે ગુજરાતના સુવર્ણ જયંતિ વર્ષની ઉજવણી.
 
‘‘ગરવી ગુજરાત'' એટલે પર-સેવા માટે પરસેવો પાડે તે ગુજરાત ગુજરાતમાં વસતો ગુજરાતી જ નહીં પરંતુ વિશ્વભરમાં વસતા ગુજરાતીએ સદાકાળ ગુજરાત ખડું કર્યું છે અને વિશ્વના ખૂણે ખૂણે વસવા, દરિયાને પાર કરવા સાહસરૂપે નાના નાવડામાં સફર કરી હતી તે ૧૯મી અને ર૦મી સદી હતી. હવે યુગ બદલાયો છે. એકવીસમી સદીમાં આપણો સંકલ્‍પ એ જ હોય કે આખું વિશ્વ ગુજરાતને પોતાનુ ‘ઘર' બનાવે તેવી મહત્ત્વાકાંક્ષા આપણી છે, એમ મુખ્‍ય મંત્રીશ્રીએ જણાવ્‍યું હતું.
 
મુખ્‍યમંત્રીશ્રીએ ગુજરાતીની સમાજ શક્‍તિને આહ્‌વાન આપતા જણાવ્‍યું કે, દરેક ગુજરાતી એક એક સંકલ્‍પ કરે તો, સાડા પાંચ કરોડ ગુજરાતીઓના સાડાપાંચ કરોડ સંકલ્‍પથી ગુજરાતની વિકાસયાત્રા એકીસાથે સાડા પાંચ કરોડ કદમની હરણફાળ ભરશે જે સૌથી વિરાટ પગલું ગણાશે.
 
આઝાદીની લડત દરમિયાન ગુજરાતના જનતા જનાર્દન સમર્પિત ભાવથી સમાજને ઘડવાનું સામર્થ્‍ય બતાવ્‍યું હતું. હવે સ્‍વરાજ પ્રાપ્તિ પછી ‘‘સુરાજ્‍ય''ના નિર્માણ માટે સમાજશક્‍તિને નેતૃત્‍વ પ્રેરિત કરવાની છે, એમ વિશ્વાસપૂર્વક તેમણે જણાવ્‍યું હતું.
 
એક નાનાકડો સંકલ્‍પ પણ ગુજરાતની આવતીકાલ ઘડવા માટે મોટી શક્‍તિ બનશે એવી અભિલાષા વ્‍યકત કરતાં શ્રી નરેન્‍દ્રભાઈ મોદીએ જણાવ્‍યું કે, ગુજરાતીનું સત્‍વ, શક્‍તિ, સામર્થ્‍ય, સંકલ્‍પપૂર્વક સૌને જોડવાનો અવસર એટલે ગુજરાતની સુવર્ણ જયંતિનો અવસર. આજે ગુજરાત વિધાનસભાની આ ઐતિહાસિક ઘટનાની વેળાએ ગુજરાતની સ્‍થાપના માટે મહાગુજરાતની ચળવળમાં જેમણે પોતાની જવાની અને જીવન ગુમાવ્‍યા તે સૌને નમન કરીને શ્રદ્ધાંજલિ અર્પું છું.
 
ગુજરાતના વર્તમાન અને ભૂતપૂર્વ જનપ્રતિનિધિઓનો પ્રભાવ અને અનુભવી નેતૃત્‍વ સમાજ અને જાહેર જીવનમાં આજે પણ છે અને ગુજરાતની આવતીકાલને સ્‍વર્ણિમ બનાવવા માટેની સમાજશક્‍તિની ચેતના ઉજાગર કરવામાં આપ સૌની પ્રેરણા નવું બળ પુરું પાડશે, એમ મુખ્‍ય મંત્રીશ્રીએ જણાવ્‍યું હતું.
અમદાવાદઃ શનિવારઃ મુખ્યમંત્રી શ્રી નરેન્દ્રભાઇ મોદીએ આજે અમદાવાદમા સ્વર્ણિમ ગુજરાત પુસ્તક મેળાનું ઉદ્‍ધાટન કરતાં ગુજરાતના સુવર્ણજયંતી અવસરે સમગ્ર રાજ્યમાં "વાંચે ગુજરાત''નું જન અભિયાન, સમાજની શકિત જગાડીને હાથ ધરાશે. આવતીકાલનું ગુજરાત સાક્ષર બને તે માટે સમાજમાં પુસ્તકનો મહિમા પ્રતિષ્ઠિત કરવા માટે તમેણે અપીલ કરી હતી.
 
પુસ્તક-સાહિત્ય પ્રત્યેની પ્રીતિથી સમાજમાં ગુણવિકાસનું વાતાવરણ બને છે તે વાત કેન્દ્રસ્થાને રાખીને પુસ્તક-ખરીદી માટે જનમાનસ કેળવવાના સેમિનાર યોજવા માટે મુખ્યમંત્રીશ્રીએ પુસ્તક પ્રકાશકોને પ્રેરક સૂચન કર્યું હતું. પુસ્તકની પરબ ચલાવવા માટે પુસ્તકપ્રેમી સ્વજનોને આમંત્રીને પુસ્તક વાંચનથી જીવનમાં વળાંક કઇ રીતે આવે તેના અનુભવ નવી પેઢીને મળે તેવી પરંપરા ઉભી કરવા પણ તેમણે સૂચવ્યું હતું.
 
ગુજરાત પ્રકાશક મંડળના ઉપક્રમે અમદાવાદમાં આજથી દશમી જાન્યુઆરી સુધી આ " સ્વર્ણિમ ગુજરાત પુસ્તક મેળો '' સાહિત્યપ્રેમીઓ માટે ગ્રંથયાત્રા ધામ બની રહેશે. મુખ્યમંત્રીશ્રીએ પુસ્તક લેખનથી પુસ્તક પ્રકાશન અને વેચાણની સમગ્રત્તતા પ્રક્રિયા સરકારની ગ્રંથાલય ગ્રાન્ટ ઉપર નિર્ભર રહેવાને બદલે સમાજમાં તેનું પ્રતિષ્ઠિત મહિમા વંદન થવું જોઇએ. શાળાના બાળકોએ તો પુસ્તક મેળાની મુલાકાત અવશ્ય લેવી જ જોઇએ. પુસ્તક પ્રત્યે સમાજની અભિરૂચિ કેળવવા માટેની પહેલ કરવા માટે પુસ્તકમેળાના આયોજકોને તેમણે અભિનંદન આપ્યા હતા.
 
પરિવારમાં શિક્ષણમાં પરીક્ષાકેન્દ્રી વાતાવરણને બદલે પરીક્ષાના "ગુણાંક''ને બદલે "ગુણ-પુજા'' ઉપર ધ્યાન કેન્દ્રીત કરીને બાળમાનસમાં જ્ઞાનરૂચિ માટે સારા પુસ્તકો પ્રત્યેની પ્રીતિ કેળવવા ઉપર તેમણે ભાર મુકયો હતો.

મુખ્યમંત્રીશ્રીએ એમ પણ જણાવ્યું કે બાળકોને પુસ્તકોની પસંદગી કરવાનો અધિકાર છે અને પરિવારના વડિલોએ બાળકને મોકળાશ આપવી જ જોઇએ.

સરકારી કાર્યક્રમોમાં ફૂલમાળાના ""બુકે'' થી મહાનુભાવોનું સ્વાગત નહીં પરંતુ "બુક (પુસ્તક)''કે ખાદી-રૂમાલથી થાય તેવી પહેલરૂપ પરંપરા ગુજરાત સરકારે શરૂ કરી છે તેમ પણ તેમણે જણાવ્યું હતું.

"પ્રત્યેક સંપન્ન પરિવાર પોતાના ધરમાં ઓછામાં ઓછા ૫૦ પુસ્તકોની લાયબ્રેરી વસાવે તેવો આગ્રહ સ્વર્ણિમ ગુજરાત વર્ષની ઉજવણીના અવસરે તેમણે કર્યો હતો.''
 
ગુજરાત વિશેના સર્વગ્રાહી વિકાસ-વિષયો ઉપરના પુસ્તકોનું ""સામાન્ય જ્ઞાન-પ્રશ્નોતરી શ્રેણીરૂપે ભગીરથ પ્રકાશન કાર્ય હાથ ધરવા પણ પ્રકાશકોને તેમણે અનુરોધ કર્યો હતો.'' પુસ્તક વ્યવસાયના સંવર્ધન માટે ઓડિયો બુકસ, ડિજિટલ બુકસ જેવી નવી જ્ઞાન-ટેકનોલોજીના વિનિયોગ કરવા ઉપર ભાર મુકતા મુખ્યમંત્રીશ્રીએ ગુજરાત સાહિત્ય-પ્રકાશનને નવો ઓપ આપવા અને ગુજરાતના સમૃધ્ધ સાહિત્યના વારસારૂપ પણ હાલ અલભ્ય બનેલ ગ્રંથો-પુસ્તકોની સૂચિ બનાવીને સ્વર્ણિમ ગુજરાત વર્ષ નિમિત્તે આવા પુસ્તકોના પૂનઃપ્રકાશનની યોગ્ય કાળજી લઇને દરખાસ્ત તૈયાર કરવા પણ તેમણે સૂચવ્યું હતું.
 
ગુજરાત પ્રકાશક મંડળના પ્રમુખ શ્રી જિતેન્દ્રભાઇ દેસાઇએ પુસ્તક પ્રકાશનને નાનો પણ ચાવીરૂપ ઉઘોગ ગણાવીને જણાવ્યું હતું કે, પુસ્તકોના વાંચન પ્રત્યે યુવા પેઢીમાં ભૂખ જાગે તેવા સામુહિક પ્રયાસો સમાજથકી થવા જરૂરી છે. સ્વર્ણિમ ગુજરાત જયંતિ વર્ષે પુસ્તકમેળા વાર્ષિક ઉત્સવ તરીકે દર વર્ષે ઉજવાય તેવી નેમ ગુજરાત પ્રકાશક મંડળ દ્વારા લેવામાં આવી છે.
 
નવનીત પબ્લીકેશન્સના શ્રી શાંતિલાલ ગાલાએ ગુજરાતી ભાષા અને પુસ્તકોનું મહત્વનું સમજાવીને આ પુસ્તક મેળામાં રજૂ કરવામાં આવેલા પ્રેરણા પુસ્તકો, સાહસ કથાઓ, બાળકોના પુસ્તકો, અલભ્ય પુસ્તકો, સંશોધન ગ્રંથો, નામાંીકત લેખકોના વિશેષ માંગ ધાવતા પુસ્તકો, ધાર્મકિ, શૈક્ષણિક અને ટેકનોલોજી, ગૃહ જીવનને લગતા ઉપયોગી પુસ્તકોની વિગતવાર માહિતી આપી હતી.
 
ગુજરાત લો સોસાયટીના પ્રમુખ શ્રી સુધીર નાણાંવટી, ગુજરાત પ્રકાશક મંડળના મંત્રી શ્રી વિપ્લવ પૂજારા, નવનીતના શ્રી છોટુભાઇ ગાલા, જાણીતા પુસ્તક પ્રકાશકો, લેખકો, વાંચકો વગેરે આ પ્રસંગે ઉપસ્થિત રહ્યા હતા.
મુખ્યમંત્રી શ્રી નરેન્દ્રભાઇ મોદીએ મક્કમતાપૂર્વક જણાવ્યું હતું કે, ગરીબોના હકકનું લૂંટી લેનારા વચેટીયા-દલાલોને નેસ્તનાબુદ કરવા માટે ગરીબ કલ્યાણ મેળાનું અભિયાન ઉપાડયું છે અને ગાંધીનગરમાં બેઠેલી આપની સરકાર ગરીબોના હક્કનું રક્ષણ કરવા ગરીબોનું કર્જ ચૂકવવા પ્રતિબધ્ધ છે.
 
ગુજરાતના જાહેરજીવનમાં સૌથી લાંબામાં લાંબા ૩૦૦૦ દિવસના શાસનનો અવસર ગરીબનું કર્જ ચૂકવવાનો ઋણસ્વીકાર કરવાનો સેવા અવરસ બનાવ્યો છે એમ તમેણે જણાવ્યું હતું.
 
અમદાવાદ જિલ્લાના છ તાલુકાઓ, વિરમગામ, સાણંદ, દસક્રોઇ, સીટી, માંડલ અને દેત્રોજ તાલુકામાં ગરીબી સામે લડાઇના અભિયાન રૂપે આજે વિરમગામમાં ગરીબ કલ્યાણમેળો યોજવામાં આવ્યો હતો. ગુજરાતમાં ૫૦ જેટલાં ગરીબ કલ્યાણ મેળા યોજવાની શ્રી નરેન્દ્રભાઇ મોદીની શૃંખલામાં વિરમગામ ૧૨મા ક્રમે આવ્યું છે અને આજે ૪૫,૭૫૦ લાભાર્થીઓને એકંદરે રૂ.૪૦ કરોડના સરકારી યોજનાના લાભાર્થીઓને હક્કો-સાધન-સહાય મુખ્યમંત્રીશ્રી અને અન્ય મંત્રીશ્રીઓના હસ્તે આપવામાં આવ્યા હતા.
 
ગરીબ કલ્યાણ મેળાના અભિયાનની ભૂમિકા આપતાં મુખ્યમંત્રીશ્રીએ જણાવ્યું હતું કે, ગુજરાતમાં સૌથી લાંબામાં લાંબા ૩૦૦૦ દિવસના શાસનનો વિક્રમ અમારે શીરે નોંધાયો છે એવું કીર્તિમાન અને જયજયકાર કરવાની પરંપરા છોડીને અમે ગુજરાતની જનતા જનાર્દનનો ઋણ સ્વીકાર કરવા ગરીબો-વંચિતોની સેવા કરવાનું અભિયાન ઉપાડયું છે. જે લોકોએ મતપેટી માટે જનતાની આંખમાં ધૂળ નાંખી, સરકારની તિજોરીઓ લૂંટાવી નાખી, કરદાતા, જનતાની પરસેવાની કમાણી વેડફી નાંખી અને છતાં ગરીબનું શોષણ થતું જ રહ્યું છે. અમે આ સ્થિતિમાંથી ગરીબને મુકત કરવાનો ઉપાય શોધી કાઢ્યો છે.
 
તેમણે જણાવ્યું કે, ગાંધીનગરની તિજોરીમાંથી સરકારની યોજનાનો રૂપિયો ગરીબના ઘર સુધી પહોંચે ત્યારે પણ સોએ સો પૈસા સ્હેજ પણ રૂપિયો ઘસાયા વગર હાથોહાથ પહોંચાડવા આ ગરીબ કલ્યાણમેળાનો યજ્ઞ માંડયો છે. પૂર્વ પ્રધાન મંત્રી સ્વ. રાજીવ ગાંધીએ ખુદ રાવ કરતાં આવેલા કે દિલ્હીની તિજોરીમાંથી નીકળેલો ગરીબ માટેનો રૂપિયો ઘસાતો ઘસાતો જઇને ગરીબના હાથમાં આવે ત્યારે માંડ ૧૫ પૈસા મળે- પણ આનો ઉપાય કોઇને સૂઝ્યો નથી. ગુજરાતે આ સમસ્યાનું સમાધાન કરી આપ્યું છે.
 
ગરીબને ગરીબાઇ સામે લડવા માટે શકિતમાન બનાવવો છે અને ગરીબને દેવાદાર બનાવતી ભ્રષ્ટ યોજનાકીય રીતિનીતિઓમાંથી બહાર કાઢીને ગરીબી સામે જંગ છેડ્યો છે એમ તેમણે જણાવ્યું હતું. મુખ્યમંત્રીશ્રીએ નિર્ધારપૂર્વક જણાવ્યું કે, વચેટીયા-દલાલો જેવો ઉપરવાળાને આપવાનો છે તેમ ભ્રમમાં નાખીને ગરીબોના હક્કો લૂંટી રહ્યા છે તેને નેસ્તનાબુદ કરવા આ સરકારે અભિયાન ઉપાડયું છે. કટકી કંપનીઓના ખિસ્સા કાતરુથી આ ગરીબ જનતાને રક્ષણ આપવા આ સરકાર ચોકીદાર બનીને બેઠી છે.
 
તેમણે ગરીબ જનતાને ગરીબી સામે લડાઇનો સૈનિક ગણાવતાં જણાવ્યું કે, કોઇપણ ગરીબ કે વંચિતે આ વચેટીયા-દલાલને તેના હક્કની એક પાઇ પણ ચૂકવવાની કોઇ જરૂર નથી. આ સરકાર ગરીબોની બેલી છે અને ગરીબ પરિવારના જન્મથી મૃત્યુ સુધી ગરીબોને મદદ કરવા આ સરકારે ખડે પગે મથામણ કરી યોજનાઓ બનાવેલી છે તેની ભૂમિકા તેમણે વિગતવાર યોજનાઓની રૂપરેખા સાથે આપી હતી. આના પરિણામે ગરીબ, વંચિતોના જીવનમાં જે બદલાવ આવ્યો છે તેની સવિસ્તર સમજ તેમણે આપી હતી.
 
મતપેટીઓ ભરવાની લાયમાં તેમણે ગરીબોના ઘરમાં મોત પેટીઓ મુકી છે તેના કારણે જ ગરીબી દૂર થઇ નથી. આ સરકારે તો કરોડો રૂપિયાની કીંમતી જમીનના, ઘરવિહોણા ગરીબોને આવાસના પ્લોટ આવાસના પ્લોટ વિનામૂલ્યે આપી દીધા છે. ગુજરાતનો જન્મ થયો ત્યારથી અત્યાર સુધી જેટલા પ્લોટ આવાસ ગરીબને મળ્યા છે તેના કરતાં પણ વધારે પ્લોટ આ ૫૦ દિવસના અભિયાનમાં આપી દેવાશે એમ તેમણે જાહેર કર્યું છે.
 
તેમણે ગરીબોને તેમના હક્કનું મળ્યું ન હોય કે નબળી ગુણવત્તાવાળું મળ્યું હોય તો મુખ્યમંત્રીશ્રીએ એક પોસ્ટકાર્ડ લખી દેવા અનુરોધ કર્યો હતો. આ સરકાર ગરીબના હક્ક માટે કંઇપણ કરવા તૈયાર છે. ગુજરાત સરકાર તો ગરીબોને ખોબલા ભરીને મદદ કરવા રાતદિવસ મથામણ કરે છે પણ મોંઘવારીનેની મુશીબત ગરીબનું સૂપડે સૂપડે તાણી જાય છે. દિલ્હીની કોંગ્રેસ સરકારના કાન એટલા બહેરા છે કે ગરીબોએ સામૂહિક અવાજ ઉઠાવવાની જરૂર છે. ગરીબીના ખપ્પરમાંથી મુકત થવા મોંઘવારી મુશીબત બની ગઇ છે તેમ તેમણે જણાવ્યું હતું.
 
અમદાવાદ જિલ્લાના પ્રભારી અને મહેસુલ મંત્રી શ્રીમતી આનંદીબેન પટેલે જણાવ્યું હતું કે, વચેટીયાઓને દૂર કરી ગરીબોને સીધો લાભ આપવા આ મેળાઓનું આયોજન કરાયું છે. રાજ્યની અલગ સ્થાપના પછી કોઇ સરકારે ન કરી હોય તેટલી ચિંતા મહિલાઓના વિકાસ માટે આ સરકારે કરી છે. મુખ્યમંત્રીશ્રીએ મહિલા અને બાળકલ્યાણનો અલગ વિભાગ બનાવ્યો તે તેની પ્રતિતી કરાવે છે. રાજ્યના દોઢ કરોડ બાળકોને શાળા આરોગ્ય તપાસ કાર્યક્રમ હાથ ધરીને આવરી લેવાયા છે. એટલું જ નહીં સો જેટલાં બાળકોને સઘન સારવાર માટે રાજ્ય બહાર મોકલી ઓપરેશન-સારવાર કરાયા છે. સગર્ભા માતાઓને પોષણક્ષમ આહાર મળે તે માટે યોજના અમલી બનાવી છે. એટલું જ નહીં માતા-બાળમરણ ઘટાડવા માટે પણ આ સરકારી પ્રયાસો હાથ ધર્યા છે તેમ તેમણે ઉમેર્યું હતું.
 
આદિજાતિ કલ્યાણ રાજ્ય મંત્રી શ્રી જશવંતસિંહ ભાભોરે જણાવ્યું હતું કે, રાજ્ય સરકારે ગરીબ કલ્યાણ મેળા દ્વારા ગરીબો-જરૂરિયાતમંદોના જીવનની કાયાપલટ કરવાની ઝૂંબેશ હાથ ધરી છે. ગરીબોના જીવનમાં કલ્યાણનો દીપ પ્રજ્વલિત થાય તેવા આશયથી સરકારે ગરીબોને હાથોહાથ હક્ક આપવાની મથામણ હાથ ધરી છે. તમામ ગરીબોને આવાસ મળે, ભૂમિહિનોને જમીનના પ્લોટ આપવા જેવા સંખ્યાબંધ કલ્યાણકીય કામો આ સરકારે કર્યા છે. ભૂતકાળમાં ગરીબોને લાભ લેવા ધક્કા ખાવા પડતા હતા ત્યારે આ સરકાર ગરીબોના ઘર-ગામ સુધી હક્ક-સહાય-લાભ લઇને આવી છે.
 
સંસદીય સચિવ શ્રી યોગેશ પટેલ તથા ગુજરાત વિધાનસભાના નાયબ મુખ્ય દંડક શ્રી અંબાલાલ રોહિતે પ્રાસંગિક પ્રવચનમાં જણાવ્યું હતું કે, ગરીબોને ઘરઆંગણે લાભ આપવા આવા ગરીબ કલ્યાણમેળાનું આયોજન કરાયું છે.
 
અમદાવાદ જિલ્લા કલેકટર શ્રી હારિત શુકલાએ જણાવ્યું હતું કે, જિલ્લાના ૬ તાલુકાના ૪૫,૦૦૦થી વધુ લાભાર્થિઓને ૬૯ જેટલી યોજનાઓ અંતર્ગત રૂપિયા ૪૦ કરોડના લાભ અપાયા છે.
 
આ પ્રસંગે ૨૭૬૨ લાભાર્થિઓને પ્લોટ, ૪૫૭૮ લાભાર્થિઓને રૂ.૩૦.૯૩ લાખના સહાય ચેક, ૨૭૭૧ લાભર્થિઓને રૂ.૯૨.૪૮ લાખની કિટ સહાય, ૮૨૦૭ લાભાર્થિઓને રૂ.૧૧૩.૩૭ લાખની કૃષિ વિષયક સહાય ઉપરાંત સંખ્યાબંધ ગરીબો-જરૂરિયાતમંદોને લાભ અપાયા હતા.
 
અમદાવાદ એ.પી.એમ.સી. દ્વારા રૂ. એક લાખનો ચેક તથા અન્ય સંસ્થાઓ દ્વારા રૂ.૬૭,૦૦૦ના ચેક મુખ્યમંત્રીશ્રીના કન્યા કેળવણીનિધીમાં અપાયા હતા.
 
આ પ્રસંગે મંત્રી શ્રી અમીતભાઇ શાહ, સંસદીય સચિવ શ્રી સુંદરસિંહ ચૌહાણ શ્રી જયદ્રથસિંહ પરમાર, સાંસદ શ્રી કીરીટભાઇ સોલંકી, ધારાસભ્ય સર્વ શ્રી પ્રાગજીભાઇ પટેલ, કમાભાઇ રાઠોડ, બાબુભાઇ જે. પટેલ, કાંતિભાઇ લકુમ, વલ્લભભાઇ કાકડીયા, રાકેશ શાહ, રણછોડભાઇ મ્હેર, જિલ્લા પંચાયતના પ્રમુખશ્રી, પૂર્વ સાંસદ શ્રીરતિલાલ વર્મા, પૂર્વ મંત્રી શ્રી ભૂપેન્દ્રસિંહ ચૂડાસમા, જિલ્લા ભાજપા પ્રમુખ-પદાધિકારીઓ, અગ્રણીઓ વગેરે ઉપસ્થિત રહ્યા હતા.
મુખ્યમંત્રી શ્રી નરેન્દ્રભાઇ મોદીએ જણાવ્યું છે કે, ગરીબી સામે લડવાનો સાચો માર્ગ ગુજરાતે બતાવ્યો છે, પરંતુ મોંઘવારીના કાળજાળ આતંક સામે કેન્દ્ર સરકાર તદ્દન ઉદાસિન કેમ છે? ગુજરાત સરકાર તો ગરીબોને પડખે ઉભી રહી છે એમ તેમણે જણાવ્યું હતું
 
જે જનતા જનાર્દને આ સરકાર ઉ૫ર ભરોસો મૂકીને ગુજરાતમાં સૌથી લાંબા એવા ૩૦૦૦ દિવસના શાસનનો સેવાનો અવસર આપ્‍યો છે, એ જનતાનું કર્જ ચૂકવવું છે, ગરીબોનું ઋણ ચૂકવવું છે, એમ તેમણે જણાવ્યું હતું .
 
ગુજરાતમાં ગરીબોના કલ્‍યાણ માટેનો સેવાયજ્ઞ કરી રહેલા મુખ્‍યમંત્રીશ્રીએ આજે જામનગરમાં પાંચ તાલુકાઓના મળીને ૩૦ હજાર જેટલા ગરીબોને તેમના મળવાપાત્ર હક્કો અને સહાયરૂપે રૂ.48.51 કરોડનું વિતરણ કર્યું હતું. જામનગર, ધ્રોલ, જોડીયા, કાલાવડ અને લાલપુરના પાંચ તાલુકાઓનાં ગામે ગામથી શોધીને ગરીબો-વંચિતોને સામે ચાલીને ગરીબ કલ્યાણ મેળામાં આમંત્રણ આપ્‍યું હતું.
 
વિરાટ જનમેદનીનું અભિવાદન ખુલ્લી જી૫માં ફરીને કર્યા બાદ શ્રી નરેન્દ્રભાઇ મોદીએ જણાવ્યું કે, ભૂતકાળમાં ચૂંટણી આવે ત્યારે જ ગરીબો યાદ આવતા એવી સ્થિતિ હતી. અમે આ ગરીબોને છેતરવાની પરં૫રા છોડીને, આ સરકારને લાંબામાં લાંબા શાસનના ૩૦૦૦ દિવસ પૂરા થવા જય જયકાર કરવાનો માર્ગ છોડીને, ગરીબોના ભલા માટે સેવા કરવાનો અવસર અ૫નાવ્યો છે. મારે ગુજરાતની જનતાનું ઋણ ચૂકવવું છે, ગરીબ જનતાનું કર્જ ચૂકવવું છે.
 
ગુજરાતની સ્વર્ણ જયંતીના 50 વર્ષની ઉજવણીમાં ૫ણ આ અવસર ગરીબોને ગરીબી સામે લડવા માટે તૈયાર કરવાનો છે એવા નિર્ધાર સાથે રાજ્યમાં 50 દિવસમાં 50 ગરીબ કલ્યાણ મેળા કરીને 25 લાખ જેટલા ગરીબો-વંચિતોને તેમના હક્કનો આ૫ણે રૂપિયો હાથોહાથ આ૫વાનું સેવાકાર્ય ઉપાડ્યું છે, એમ તેમણે જણાવ્યું હતું.
 
મુખ્યમંત્રીશ્રીએ જણાવ્યું કે, ઘર વિહોણા, જમીન વગરના ગરીબ વંચિતોને આઝાદી પછી ગુજરાતનો જન્મ થયો ત્યારથી જેટલા પ્‍લોટ મળ્યા છે તેના કરતા૫ણ વધારે પ્‍લોટ આ ૫૦ દિવસમાં આપી દેવા છે અને તેની કિંમત અબજો રૂપિયાની થવા જાય છે, જે ઘરવિહોણાને મફત મળે છે.
 
ગરીબોને લૂંટનારા, ગરીબોનું શોષણ કરનારા, છેતરપંડી કરીને ગરીબના હક્કનું પડાવી લેનારા વચેટીયા-દલાલોની ઝોલા છા૫ ઠગ ટોળકીને નેસ્તનાબૂદ કરવા આ ગરીબ કલ્યાણ મેળા યોજીને આ સરકારે, ગરીબી દૂર કરવા માટેનો સાચો રસ્તો લીધો છે. પૂર્વ વડાપ્રધાન સ્વ. રાજીવ ગાંધીએ ચિંતા તો વ્યકત કરેલી કે, સરકારનો રૂપિયો દિલ્હીથી ગરીબના હાથમાં પહોંચતા માત્ર 15 પૈસા થઇ જાય છે, ૫ણ આ સમસ્યાનો ઉકેલ શોધી શકયો નથી, ૫ણ ગુજરાતે ગરીબોને ગરીબીમાંથી ઉ૫ર ઉઠાવવાનું બીડું ઝડપ્‍યું છે. આ ગરીબ કલ્યાણ મેળા એનો જવાબ છે, એમ તેમણે જણાવ્યું હતું. “કોઇ ગરીબ ગરીબીમાં રહેવાનું પસંદ કરવાનો નથી અને ગરીબ માબા૫ પોતાના સંતાનોને ગરીબીમાંથી મૂક્તિ આપવા આતુર છે, ત્યારે આ સરકાર તેની પડખે ઉભી રહેવાની છે. ગરીબ માતાની કુખમાં ગર્ભના પોષણની ચિન્તા સાથે જન્મથી મૃત્યુ સુધી ગરીબનું કલ્યાણ કરવાની યોજનાઓ લઇને આ સરકાર મદદ કરવાની છે.” એમ મુખ્યમંત્રીશ્રીએ સરકારની કલ્યાણ યોજનાઓના ભૂમિકા આ૫તા જણાવ્યું હતું.
 
મુખ્યમંત્રીશ્રીએ જણાવ્યું કે, ગરીબ પરિવારની સગર્ભા માતાના પોષણ અને જીંદગી બચાવવાની કાળજી લઇને ગરીબ કુટુંબમાં નારીશક્તિને નિર્ણયમાં ભાગીદાર બનાવવા સરકારી આવાસ સહિતની સહાયમાં પ્રથમ અગ્રતા ગરીબ માતા કે બહેનને માલિકી હક્ક માટે અપાય છે.
 
ગરીબી સામે લડવાનું સૌથી મોટું હથિયાર શિક્ષણ છે અને આ સરકાર ગરીબને તેવા હક્કની બધી જ સહાય આપી શક્તિ પૂરી રહી છે ત્યારે ગરીબ કુટુંબનું એક ૫ણ સંતાન અશિક્ષિત રહે નહીં એ માટે અનેકવિધ શૈક્ષણિક સહાય સુવિધાની યોજનાઓની રૂપરેખા ૫ણ તેમણે આપી હતી.
 
શ્રી નરેન્દ્રભાઇ મોદીએ પીડા દર્શાવતા જણાવ્યું કે, ગરીબી સામેની લડાઇ લડવાનો માર્ગ ગુજરાતે બતાવ્યો છે તેમ છતાં મોંધવારી સૌથી મોટી મુશીબત બનીને રૂકાવટ કરી રહી છે પરંતુ કેન્દ્ર સરકારના કાને એવી બહેરાશ આવેલી છે કે, ગરીબો કાળજાળ મોંધવારીમાં પીસાઇ રહયા છે છતાં કેન્દ્રને આ પીડાંની કાંઇ પરવા જ નથી. આ માટે હવે ગરીબોએ સામૂહિક અવાજ ઉઠાવવો પડશે એમ તેમણે જણાવ્યું હતું
 
મુખ્યમંત્રીશ્રીએ ગરીબોને ખાતરી આ૫તા એમ ૫ણ જણાવ્યું કે, ગરીબોને તેમના હક્કની સાધન-વસ્તુમાં કાંઇ નબળી ગુણવતાની ફરિયાદ હોય તો મુખ્યમંત્રીને એક પોષ્‍ટકાર્ડ લખીને મોકલે, સરકાર જરૂર પગલા લેશે
 
નાણામંત્રી શ્રી વજુભાઇ વાળાએ આ પ્રસંગે સંબોધન કરતા જણાવ્યું હતું કે, સંસ્કારની સાથે સમૃધ્ધિ જરૂરી છે ત્યારે સંસ્‍કારી ગુજરાતના ગરીબો સમૃધ્ધ બને તે માટે રાજ્ય સરકારે પ્રયાસો હાથ ધર્યા છે. બાળકો ભણે તે માટે ૫ણ પ્રયાસો કરી રહી છે. શિક્ષણની સાથે સંસ્‍કાર અને સમૃધ્ધિ બન્ને આવે છે.
 
આ પ્રસંગે સંબોધન કરતા વન અને પર્યાવરણ મંત્રી શ્રી કિરીટસિંહ રાણાએ જણાવ્યું હતું કે, રાજ્યમાં ગરીબોના ઉત્‍કર્ષ માટે રાજ્ય સરકારે અનેક યોજનાઓ અમલમાં મુકી છે. રાષ્‍ટ્રીય પર્વો જિલ્લા કક્ષાએ ઉજવી તેને વિકાસ સાથે સાંકળ્યા છે. ગરીબોને સીધો લાભ ઝડ૫થી મળે તે માટેના સરકારના પ્રયાસો છે. કૃષિ મહોત્સવ, શાળા પ્રવેશોત્સવ જેવા અનેક વિકાસલક્ષી અભિયાનો હાથ ધર્યા છે. કરોડોના લાભો એક જ સ્થળેથી આજે વિતરણ કરવામાં આવી રહયા છે
 
પછાત કલ્યાણ વિભાગના મંત્રી શ્રી વાસણભાઇ આહિરે આ પ્રસંગે સંબોધન કરતા જણાવ્યું હતું કે, રાષ્‍ટ્રની આઝાદીની પરં૫રા સમસ્ત સમાજના ઉત્‍કર્ષ માટેની રહી છે. બાળકોને શિષ્‍યવૃતિ શાળાના પ્રારંભના દિવસે જ આ૫વામાં આવે છે. બક્ષીપંચના વર્ગો માટે શિક્ષણ ઉત્‍કર્ષની યોજના અસરકારક રીતે અમલમાં છે, જેમાં એરહોસ્ટેસની તાલીમ આ૫વામાં આવે છે, પયલોટની તાલીમ ૫ણ આપવામાં આવે છે.
 
આ પ્રસંગે સંબોધન કરતાં ગુજરાત વિધાનસભાના મુખ્યદંડક શ્રી આર.સી.ફળદુએ જણાવ્યું હતું કે, સમાજમાં તમામ વર્ગોને પ્રાધાન્ય આ૫વામાં સરકારનો મુખ્ય ઉદ્દેશ છે, રાજ્ય સરકારે ગરીબોની ચિંતા કરી છે અને આજે એક જ સ્થળે હજારો લાભાર્થીઓને સહાય આપી નવો ઇતિહાસ સર્જ્યો છે. સમગ્ર રાજ્યમાં આ પ્રકારના મેળા યોજાઇ રહ્યા છે અને દરીદ્રનારાયણની ચિંતા કરી છે. દંડકશ્રીએ રાજ્ય સરકારની વિવિધ યોજનાઓનો પરિચય આપ્‍યો હતો.
 
આ પ્રસંગે સંસદીય સચીવ શ્રી એલ. ટી. રાજાણી, મેયર શ્રી કનકસિંહ જાડેજા, જિલ્લા પંચાયત પ્રમુખ શ્રી પાલાભાઇ કરમુર, ધારાસભ્ય શ્રી મુળુભાઇ બેરા, શ્રી મેઘજીભાઇ કણઝારીયા , પ્રો. વસુબેન ત્રિવેદી, શ્રી લાલજીભાઇ સોલંકી, શ્રી પબુભા માણેક, શ્રી રાઘવજીભાઇ પટેલ, શ્રી બ્રીજરાજસિંહ જાડેજા, પૂર્વ ધારાસભ્ય શ્રી ચીમનભાઇ સાપરીયા, શ્રી પરષોતમભાઇ પટેલ, શહેર ભા.જ.પ. પ્રમુખ શ્રી નિલેશભાઇ ઉદાણી, શ્રી રમેશભાઇ મુંગરા, આગેવાનો-પદાધિકારીઓ ઉપસ્થિત રહ્યા હતા. મુખ્યમંત્રીશ્રીનું શબ્દોથી સ્વાગત જિલ્લાના પ્રભારી સચીવ શ્રી હરિભાઇ પટેલે કર્યું હતું.
 
આ પ્રસંગે જીલ્‍લાના પ્રભારી સચીવ શ્રી હરિભાઇ પટેલ, જિલ્લા કલેકટર શ્રી સંદીપકુમાર, જિલ્લા વિકાસ અધિકારી શ્રી જે.એમ.લુણી, જીલ્‍લા પોલીસ વડા શ્રી આર.વી.જોટંગીયા, ઉચ્ચ અધિકારીઓ ઉપસ્થિત રહ્યા હતા
 
કાર્યક્રમના પ્રારંભે સ્વાગત પ્રવચન કરતા જિલ્લા કલેકટર શ્રી સંદીપકુમારે જણાવ્યું હતું કે, મુખ્યમંત્રી શ્રી નરેન્દ્રભાઇ મોદીની પરિકલ્પના મુજબ આ ગરીબ કલ્યાણ મેળો યોજાઇ રહ્યો છે. આ ગરીબ કલ્યાણ મેળામાં મુખ્યપંચ ઉ૫રથી મુખ્યમંત્રીશ્રીના હસ્તે ૪૩ લાભાર્થીઓને વિતરણ કરવામાં આવ્યું છે. આ ઉ૫રાંત ૬ પેટા મંચ ઉ૫રથી ૧૨૦૦ લાભાર્થીઓને મહાનુભવોના હસ્તે વિતરણ કરવામાં આવ્યું છે. આ ઉ૫રાંત અન્ય કાઉન્‍ટરો ૫રથી ૨૫ હજાર લાભાર્થીઓને મળી કુલ ૩૦ હજારથી વધુ લાભાર્થીઓને સહાય આ૫વામાં આવી રહી છે.
 
આ પ્રસંગે વિવિધ યોજનાના પાંચ લાભાર્થીઓને ભૂતકાળમાં તેમને મળેલી સરકારી સહાયથી થયેલ લાભ અને પ્રગતિની વાતો રજુ કરી હતી. આજે આ પ્રસંગે સમગ્ર જિલ્લાના અધિકારીઓ, પદાધિકારીઓ, લાભાર્થીઓ, નાગરિકો વિશાળ સંખ્‍યામાં ઉપસ્થિત રહ્યા હતા.

મુખ્યમંત્રી શ્રી નરેન્દ્રભાઇ મોદીએ આંતરરાષ્ટ્રીય પતંગોત્સવનો અમદાવાદના સાબરમતી તટે શાનદાર પ્રારંભ કરવાતા જણાવ્યું હતું કે, મકરસંક્રાંતિ સાથે પતંગ-ઉત્સવ જોડીને ગુજરાતે પ્રકૃતિ પ્રેમના ઉત્સવનો સંદેશો વિશ્વને આપ્યો છે.

પતંગોત્સવને આતંરાષ્ટ્રીય પ્રતિષ્ઠા આપીને ગુજરાતે પતંગના માધ્યમ દ્વારા જગતને જોડવાની દિશા બતાવી છે એમ તેમણે ગૌરવપૂર્વક જણાવ્યું હતું.

ઉતરાયણના ખુશનુમા પ્રભાતે, સુર્યના કિરણોએ સાબરમતી રિવરફ્રંટ ઉપર પતંગોત્સવમાં દેશ-વિદેશના પતંગબાજો અને પતંગપ્રેમી નગરજનોનો રંગબેરંગી મહેરામણ ઉમટયો હતો. પ્રકૃતિ અને પર્યાવરણના આ પર્વનો પ્રારંભ સૂર્યવંદના અને આદિત્ય સ્તુતિના વેદગાનથી થયો હતો.

અસલ અમદાવાદની ઓળખ ધરાવતી પૃષ્ઠ ભૂમિકા સાથે સભામંચ ઉપરથી મુખ્યમંત્રીશ્રીએ બલૂન-પતંગનું ઉડયન કરાવીને આંતરરાષ્ટ્રીય પતંગોત્સવનો પ્રારંભ કરાવ્યો હતો.

નગરપાલિકા શાળાના ૭૫૦૦ બાળકોએ યોગ સંસ્કાર સાથે સૂર્યનમસ્કાર પ્રસ્તુત કરીને સૂર્ય ઉર્જાની અનુભૂતિ કરાવી હતી.

વિદેશોમાંથી ૩૪ દેશોના ૧૨૦ જેટલી પતંગવીરો અને ભારતના વિવિધ રાજ્યોના ૧૦૫ જેટલા પતંગબાજો વચ્ચે જઇને શ્રી નરેન્દ્રભાઇ મોદી હજારો પતંગપ્રેમી નગરજનોના આનંદ -ઉતસવમાં જોડાયા હતા અને ખુલ્લી જીપમાં ફરીને ઉત્સવ પ્રેમી જનતાનું અભિવાદન કર્યું હતું. તેમણે વિધાનસભા અધ્યક્ષ શ્રી અશોક ભટ્ટ અને પ્રવાસન મંત્રી શ્રી જયનારાયણ વ્યાસ સહિત રાજ્યમંત્રી મંડળના સભ્ય સાથે નગરજનોની વચ્ચે રહીને પતંગ ઉડ્ડયનની મોજ માણી હતી.

વિવિધ પ્રાન્તો- વિદેશી પ્રદેશોની વૈવિધ્ય સંસ્કૃતિક પરંપરાની પ્રસ્‍તુતિ સાથે ૨૨૫ પતંગ બાજોની માર્ચ પાસ્ટે ઉવ્સવ ચેતનાની અનુભૂતિ કરાવી હતી. પતંગોત્સવની પૂર્વ સંધ્યાએ યોજાયેલી રાષ્ટ્રીય-આંતરાષ્ટ્રીય પતંગ સ્પર્ધાના વિજેતાઓને મુખ્યમંત્રશ્રીએ પુરસ્કારો એનાયત કર્યા હતા.

‘‘આવો આપણે સહુ પ્રકૃતિને પ્રેમ કરવાનો આ ઉત્સવ ઉજવીને માનવજાતને ગ્લોબલ વોર્મિંગના સંકટમાંથી બહાર આવવાની સમાજ ઉર્જાનો આ‌વિષ્‍કાર કરીએ'' એવો સંદેશ મુખ્યમંત્રીશ્રીએ આપ્યો હતો.

શ્રી નરેન્દ્રભાઇ મોદીએ સ્વામી વિવેકાનંદ જયંતી અને મકરસંક્રાંતિ પર્વની શુભકામનાઓ પાઠવતા જણાવ્યું કે સમગ્ર દેશમાં મકરસંક્રમણનું પર્વ ઉજવાય છે જ્યારે ગુજરાતે પતંગના પુષ્પ દ્વારા સૂર્યદેવતાને અર્ધ્ય આપવાનો પતંગોત્સવ ઉજવવાની દિશા લીધી છે. આપણે સદીઓથી સૂર્ય ઉપાસના કરતા રહ્યા છીએ.

તેમણે ગ્લોબલ વોર્મિંગ અને બદલાતી આબોહવાના કારણે વિશ્વ જે સંકટોથી દોરાઇ રહ્યું છે તેમાં પ્રકૃતિ સાથેના સહઅસ્તિત્વ-ભાવને પ્રેરિત કરતી જીવનશૈલી અપનાવવા ઉપર ભાર મુકયો હતો. ‘‘પ્રકૃતિ સાથે સંઘર્ષને સ્વીકૃતિ નહીં પરંતુ પ્રકૃતિ સાથે પ્રેમ કરીને સહઅસ્તિત્વ જ માનવજાતને વૈશ્વિક સંકટમાંથી બહાર લાવશે અને સૂર્ય ઉર્જાથી વિકાસને નવી ગતિ મળશે'', એમ પણ તેમણે જણાવ્યું હતું.''

નગર પ્રાથમિક શાળાના ગરીબ બાળકોના સૂર્ય નમસ્કારથી યોગ ઉત્સવની અદભૂત પ્રસ્તુતિ માટે અભિનંદન આપતા મુખ્યમંત્રીશ્રીએ જણાવ્યું કે ભારતની સંસ્કૃતિમાં જ યોગ-સુર્ય વંદનાના સંસ્કાર જીવનશૈલીમાં વણાયેલા છે.

ગુજરાત સુવર્ણજયંતી વર્ષની ઉજવણી માટે સંકલ્પમય બન્યું છે તેનો નિર્દેશ આપતા મુખ્યમંત્રીશ્રીએ જણાવ્યું કે સાબરમતી રિવરફ્રંટ ઉપરથી ગુજરાત વિકાસની ઊંચી ઉડાન ભરવા કટિબધ્ધ છે. ૨૧મી સદીનો પ્રથમ દાયકો ગુજરાતના વિકાસની મજબૂત બૂનિયાદનો હતો હવે બીજો દાયકો સ્વર્ણિમ ગુજરાતના અવસરે વિકાસની ઊંચી ઉડાનનું વિશ્વને દર્શન કરાવશે. ‘‘હમ કલ જહાં થે વહાં સે આજ પ્રગતિ કી ઉંચી ઉડાન'' માટે સંકલ્પબધ્ધ થઇએ. ગુજરાતને માટે જેને પ્રેમ છે તે સૌ આ માટે સંકલ્પ બધ્ધ બને એમ તમેણે આહ્વાન આપ્યું હતું.

પ્રવાસન મંત્રી શ્રી જયનારાયણ વ્યાસે જણાવ્યું હતું કે, ગુજરાતની ૫૦ વર્ષની યાત્રામાંથી છેલ્લા દાયકામાં માનનીય નરેન્દ્રભાઇ મોદીના માર્ગદર્શનમાં ગુજરાતે વિકસિત દેશોની હરોળમાં આવી શકશે તેવો સાર્વત્રિક વિકાસ સાધ્યો છે અને આ વિકાસ પર્યાવરણના મિત્ર બનીને કરી રહ્યા છીએ. આ શ્રંખલામાં જનભાગીદારીથી ઉત્સવોની ઉજવણી પ્રકૃતિ પ્રેમ પ્રત્યે ગુજરાતનો આ નવતર અભિગમ દેશ માટે પથદર્શક બનશે.

ગુજરાત ભાગવત વિદ્યાપીઠના ઋષી પુત્રોએ સંસ્કૃતના શ્લોકગાન સાથે આદિત્ય સ્તુતી પ્રસ્તુત કરી હતી અને અમદાવાદ મ્યુનિસિપલ કોર્પોરેશનની ૧૦૦ શાળાના ૭૫૦૦ બાળકોએ સૂર્યવંદના કરી હતી.

આ પ્રસંગે ગુજરાત મંત્રીમંડળના સભ્યશ્રીઓ, સાંસદો, ધારાસભ્યશ્રીઓ, અમદાવાદના મેયરશ્રી નિગમના ચેરમનેશ્રી, મુખ્ય સચિવ શ્રી એ.કે.જોતી, દેશ-વિદેશથી પધારેલા પતંગબાજ મહેમાનો, અગ્રણીઓ વગેરે મોટી સંખ્યામાં ઉપસ્થિત રહ્યા હતા.

આ પ્રસંગે પતંગઆધારિત વિવિધ ગીતોના સાંસ્કૃતિક કાર્યક્રમને પણ મહાનુભાવોએ રસપૂર્વક માણ્યો હતો.

મુખ્ય મંત્રીશ્રી નરેન્દ્રભાઇ મોદીએ ગારમેન્ટ ફેશન ડિઝાઇન સેકટરમાં આધુનિકતા સાથે ભારતીય સંસ્કૃતિની પરંપરાનો સમન્વય કરીને ગારમેન્ટ ફેશન ડિઝાઇનીંગના સંશોધનો ઉપર ભાર મૂકયો છે.
 
કેન્દ્રીય કાપડ મંત્રી શ્રી દયાનિધિ મારન અને સાંસદ પૂર્વ ઉપપ્રધાનમંત્રીશ્રી એલ. કે. અડવાણી સાથે ગાંધીનગર NIFT કેમ્પસમાં મુખ્યમંત્રીશ્રી અતિથિ વિશેષ તરીકે સંબોધન કરી રહ્યા હતા.
 
ગાંધીનગરમાં NIFT નેશનલ ઇન્સ્ટીટયૂટ ઓફ ફેશન ટેકનોલોજીમાં આજે નવનિર્મિત ગર્લ્સ હોસ્ટેલ, ઓડિટોરિયમ અને સ્ટુડન્ટસ મેસ-હોલના ઉદ્દઘાટન અને NIFTના ભવન-નિર્માણના વિસ્તૃતિકરણ પ્રોજેકટનો શિલાન્યાસ સમારોહ યોજવામાં આવ્યો હતો NIFT ગાંધીનગર સંકુલમાં આ વિશેષ સુવિધાના નિર્માણ પાછળ રૂ. ૧૬ કરોડનો ખર્ચ થયો છે.
 
ફેશનની આધુનિકતામાં સ્થળ-કાળ અને સ્થિતિને ધ્યાનમાં લઇને પશ્ચિમી જગતના ફેશન માર્કેટમાં પ્રાકૃતિક શૈલીની ભારતીય પરંપરાને વણી લઇને આધુનિક ફેશન ડિઝાઇનમાં પ્રભાવ પાથરવાની ક્ષમતા ફેશન ટેકનોલોજી અને ડિઝાઇનર્સમાં હોવી જોઇએ અને NIFT આ પડકાર ઉપાડી લે તેવી અપેક્ષા તેમણે વ્યકત કરી હતી.
 
મુખ્યમંત્રીશ્રી અને અન્ય મહાનુભાવોના હસ્તે NIFT અને ગુજરાત સરકારની વનબંધુ કલ્યાણ યોજના અન્વયે ગારમેન્ટ ટ્રેઇનીંગમાં ઉતિર્ણ થયેલી વનવાસી કન્યાઓને NIFT ના સર્ટિફિકેટ એનાયત થયા હતા. આ સંદર્ભમાં શ્રી નરેન્દ્રભાઇ મોદીએ જણાવ્યું કે આધુનિકત્તમ ફેશન વર્લ્ડના માહૌલમાં પણ વનવાસી કન્યાઓએ ગારમેન્ટ સેકટરમાં પોતાના કૌશલ્યને ગૌરવ અપાવ્યું છે જે વનબંધુ યોજનાના ઉદેશની સાર્થકતા બતાવે છે.
 
NIFT ની નોલેજ એન્ડ ક્રિએટીવિટી-જ્ઞાન અને સર્જનાત્મકતાનો સમન્વય કરીને ભારતીય બૌદ્ધિક યુવાશકિતને માટે વિદેશોમાંથી આઉટસોર્સિગનું ફલક વિકસાવીને ગારમેન્ટ ફેશન ડિઝાઇનીંગમાં રોજગારીનો નવો અવસર ઉભો કરી શકે છે તેમ તેમણે જણાવ્યું હતું.
 
મુખ્યમંત્રીશ્રીએ NIFT ના ગાંધીનગર સંકુલ ઉપરાંત વડોદરા, સુરત, જામનગર, ભાવનગર સહિતના નવાં કેન્દ્રો શરૂ કરવા માટે રાજ્ય સરકારનો વિધેયાત્મક અભિગમ વ્યકત કર્યો હતો.
 
મુખ્યમંત્રીશ્રીએ જણાવ્યું કે ગુજરાતમાં વર્ષે સાત મે.ટન સોનું ઉત્પન્ન થાય છે અને વિશ્વમાં દશ હીરામાંથી નવ હીરા ગુજરાતીના હાથમાં પસાર થાય છે. આ ક્ષમતાનો નિર્દેશ કરી તેમણે જણાવ્યું કે જવેલરી ડિઝાઇન માટે NIFT ગાંધીનગર એકમાત્ર પ્રશિક્ષણ કેન્દ્ર છે અને ગોલ્ડ તથા ડાયમંડ બંનેમાં ગુજરાતનો પ્રભાવ જોતાં જવેલરીમાં કૌશલ્ય નિર્માણથી ગુજરાત વિશ્વના બજારો સર કરી શકે એમ છે.
 
ખાદી વસ્ત્રની પૂનઃપ્રતિષ્ઠા અંગે ગુજરાત સરકારે કરેલી પહેલનો ઉલ્લેખ કરી મુખ્યમંત્રીશ્રીએ જણાવ્યું કે ખાદીવસ્ત્રનો ફેશન શો ગાંધી જન્મભૂમિ પોરબંદરમાં ‘‘નિફટ'' દ્વારા થયો હતો અને ‘‘ખાદી ફોર નેશન'' પછી ‘‘ખાદી ફોર ફેશન''નો મંત્ર પણ ગુજરાતે જ આપ્યો છે.
 
આપણા દેશની પ્રશિક્ષિત યુવા પેઢીને ભારતની સંસ્કૃતિ સાથે સુસંગત કૌશલ્ય સંવર્ધન કરીને ભારત વિશ્વબજારમાં પોતાનો પ્રભાવ પાથરી શકે છે.
 
કેન્દ્રીય કાપડ મંત્રીશ્રી દયાનિધિ મારને આજે NIFT ગાંધીનગરના કાર્યક્રમમાં ગુજરાતે આધુનિક વિકાસની જે સર્વતોમુખી અદ્દભૂત સિદ્ધિઓ મેળવી છે તેની ભરપૂર પ્રસંશા કરી હતી તેમણે જણાવ્યું કે આ અનોખી સિદ્ધિઓનું સંપૂર્ણ શ્રેય શ્રી નરેન્દ્રભાઇ મોદીના કુશળ પ્રશાસનને ફાળે જાય છે.
 
ગુજરાતની આટલી વિશિષ્ઠ પ્રગતિની મીઠી ઇર્ષા થાય છે તેમ માર્મિક અને ભાવસભર અભિવ્યકતી કરતાં શ્રી દયાનિધિ મારને જણાવ્યું કે ગુજરાતે અમારા પડોશના આંધ્રપ્રદેશમાંથી ગેસ-તેલના ભંડાર શોધ્યા છે પણ તામીલનાડુ આ સિદ્ધિનું ભાગીદાર બની શકયું નથી પરંતુ તામીલનાડુમાં ગુજરાતના મોડેલ ઉપર સ્ટેટ પેટ્રોલીયમ કોર્પોરેશન રચવાનો નિર્ધાર છે.
 
કેન્દ્રીય વસ્ત્રમંત્રીશ્રી દયાનિધિ મારને ગુજરાત સરકારના સહયોગથી NIFT દ્વારા મેન મેઇડ ફાયબર અને ફેબ્રીકસનો જે સંશોધન પ્રોજેકટ હાથ ધરાઇ રહ્યો છે તેની રૂપરેખા આપી હતી. તેમણે ઉમેર્યું કે, આ સંશોધનો સમગ્ર રાષ્ટ્રમાં મેન મેઇડ ફાયબર ક્ષેત્રે અને ખાસ કરીને સુરત જેવા ગુજરાતના ટેક્ષટાઇલ્સ ઊદ્યોગના અગ્રણી નગરોને માટે મહત્વપૂર્ણ બની રહેશે.
 
શ્રી મારને એપેરલ અને ટેક્ષટાઇલ્સ સેન્ટર માટે ગુજરાત સરકારે ૯૮ લાખ રૂપિયા મંજૂર કર્યા છે તેની વિગતો આપતાં NIFT અને ગુજરાત સરકારના સહયોગથી એપેરલ અને ટેક્ષટાઇલ્સ ક્ષેત્રમાં ઉત્કૃષ્ટતા માટે આ સેન્ટર અગત્યનું માધ્યમ બનશે તેવો વિશ્વાસ વ્યકત કર્યો હતો. સુપરવાઇઝર અને ઓપરેટર લેવલની તાલીમ આપતા આ કેન્દ્રમાં મશીનરી માટે પણ ગુજરાત સરકારે પચાસ લાખ રૂપિયા મંજુર કર્યા છે, તેનો હર્ષ તેમણે વ્યકત કર્યો હતો.
 
કેન્દ્રીય વસ્ત્રમંત્રીશ્રીએ વડોદરામાં પબ્લીક પ્રાયવેટ પાર્ટનરશીપ મોડેલથી શરૂ થઇ રહેલા ખાસ ટૂંકાગાળાની તાલીમ માટેના સબ સેન્ટરની વિગતો પણ આપી હતી.
 
ગુજરાત માહિતી બ્યુરો, ગુજરાત સરકાર

મુખ્યમંત્રીશ્રી નરેન્દ્રભાઇ મોદી અને શ્રીયુત દલાઇ લામા વચ્ચે આજે વડોદરામાં અત્યંત ઉષ્માભરી અને ફળદાયી સત્સંગ બેઠક યોજાઇ હતી.

 

ગુજરાત સરકાર આયોજિત ઇન્ટરનેશનલ સેમિનાર ઓન બુદ્ધિષ્ટ હેરિટેજનાં ઉદ્દઘાટન માટે આવેલા શ્રીયુત દલાઇ લામા અને મુખ્યમંત્રીશ્રીએ આજે સવારે વિશ્વમાં બૌદ્ધ ધર્મના પ્રભાવક પાસાં વિષયક અને ગુજરાતમાં બૌધ્ધ ધર્મના સાંસ્કૃતિક અને ઐતિહાસિક વારસા સંદર્ભમાં ૩૦ મિનીટ સુધી પરામર્શ કર્યો હતો.

 

મુખ્યમંત્રીશ્રીએ ગુજરાતમાં બૌધ્ધ ધર્મના શિલ્પ, શિલાલેખો, સ્તુપ, વિહાર અને પુરાતત્વીય સંશોધનો અંગેની રૂપરેખા આપી જણાવ્યું હતું કે સમગ્ર ભારતમાં સૌથી ભવ્ય એવું બુધ્ધ-મંદિર (Majestic Temple of Buddha) નું ગુજરાતમાં નિર્માણ કરવાનું તેમનું સપનું છે. આ અંગે શ્રીયુત દલાઇ લામાના માર્ગદર્શન અને સહયોગની વિનંતી મુખ્યમંત્રીશ્રીએ કરી હતી.

 

શ્રીયુત દલાઇ લામાએ ગુજરાતમાં બૌધ્ધ ધર્મના ઐતિહાસિક વારસાની જાળવણી અને સંશોધનમાં ગુજરાત સરકારના પ્રોત્સાહક અભિગમમાં ખૂબજ ઊંડો રસ દાખવ્યો હતો અને ભવ્ય બુધ્ધમંદિરના નિર્માણ માટે સહયોગ આપવાની સહર્ષ અભિલાષા વ્યકત કરી હતી.

 

મુખ્યમંત્રીશ્રીએ ગુજરાતમાં દેવની મોરીના પુરાતત્વ ઉત્ખનનમાં ભગવાન બુધ્ધના મહાનિર્વાણ પછી જે અસ્થિકળશ ઉપલબ્ધ થયા છે તે વિશ્વ સમક્ષ ગૌરવપૂર્વક ગુજરાત પ્રસ્તુત કરે છે તેની જાણકારી પણ શ્રીયુત દલાઇ લામાને આપી હતી.

 

વિશ્વમાં માનવજાત આજે જે સંકટોથી ઘેરાયેલી છે તેના સમાધાન માટે બૌધ્ધ ધર્મ અને ભગવાન બુધ્ધના અહિંસા તથા તત્વજ્ઞાનના પ્રભાવ અંગે શ્રીયુત દલાઇ લામાએ મુખ્યમંત્રીશ્રીને જણાવ્યું કે ભારત ભૂમિ તો બૌધ્ધ ધર્મનું નિવાસ છે અને ખાસ કરીને બૌધ્ધ ધર્મનું વિજ્ઞાન, તત્વજ્ઞાન અને આધ્યાત્મિક દર્શન જોતાં ભારતમાં નાલંદા અને તક્ષશીલાના વિશ્વ વિદ્યાલયોમાં શિક્ષણ સંશોધનનું ઉત્તમ કાર્ય થયેલું છે. આ સંદર્ભમાં, ગુજરાતમાં વલ્લભી બુધ્ધ વિશ્વ વિદ્યાલયની નામના અને વડનગર સહિત રાજ્યમાં બૌધ્ધ ભિક્ષુ-સાધુઓ માટે શિક્ષણ સાધના માટેના વિહારની વ્યવસ્થા વિશે મુખ્યમંત્રીશ્રીએ શ્રીયુત દલાઇ લામાને વિશેષ જાણકારી આપી હતી અને ગુજરાત બૌધ્ધ ધર્મના તત્વજ્ઞાન દર્શન-શિક્ષણ અને સંશોધન માટે શ્રીયુત દલાઇ લામાના માર્ગદર્શનથી આગળ વધશે એમ જણાવ્યું હતું.

 

શ્રીયુત દલાઇ લામાએ મુખ્યમંત્રીશ્રી સાથેની ચર્ચામાં બૌધ્ધ ધર્મના સિધ્ધાંતોના આધાર ઉપર વિશ્વના વિવિધ રાષ્ટ્રોમાં તેના પ્રભાવની ભૂમિકાનો ખ્યાલ આપ્યો હતો.

 

મુખ્યમંત્રીશ્રીએ ગુજરાત સને ર૦૧૦-૧૧માં રાજ્યની સુવર્ણ જ્યંતી ઉજવી રહ્યું છે તે સંદર્ભમાં ગુજરાત હંમેશા સર્વધર્મ સમભાવ અને સહિષ્ણુતાથી એક કદમ આગળ અન્ય ધર્મોનો આદરભાવ આપતી ભારતીય સંસ્કૃતિને વરેલું રહ્યું છે તેમ જણાવ્યું હતું. તેમણે ૪૦૦ વર્ષ પૂર્વે પારસીઓ ગુજરાતના દરિયાકાંઠે ઉદવાડામાં આવ્યા ત્યારે તેમને ઉમળકાભેર આદરથી આવકારવામાં આવેલા તેની ભૂમિકા આપી હતી અને ઉદવાડામાં વિશ્વ ધર્મ પરિષદ  (World Religions Conference) યોજવાની નેમ વ્યકત કરી હતી. ઉદવાડા સામાજિક સદ્દભાવ માટેનું વિશ્વકેન્દ્ર બની રહેશે અને એ માટે શ્રીયુત દલાઇ લામા આશિર્વાદ આપવા પધારે એવું નિમંત્રણ પણ તેમણે આપ્યું હતું.

 
મુખ્યમંત્રીશ્રીએ શ્રીયુત દલાઇ લામાનો ભાવપૂર્વક આતિથ્ય સત્કાર કરીને તેમને સ્મૃતિભેટ આપી હતી. શ્રીયુત દલાઇ લામાએ પણ મુખ્યમંત્રીશ્રીને આર્શીવાદ સહ સ્મૃતિભેટ આપી ઉષ્માભર્યો પ્રતિભાવ વ્યકત કર્યો હતો.
 
ગુજરાત માહિતી બ્યુરો, ગુજરાત સરકાર

મુખ્ય મંત્રીશ્રી નરેન્દ્રભાઇ મોદીએ બૌધ્ધ વિરાસતના આંતરરાષ્ટ્રીય સેમિનારમાં ગુજરાતમાં ભવ્ય બુધ્ધમંદિરનું નિર્માણ કરવાનો નિર્ધાર વ્યકત કર્યો હતો. મહામહિમ શ્રી દલાઇ લામા સાથેની સત્સંગ બેઠકની ફલશ્રુતિનો ઉલ્લેખ કરી મુખ્યમંત્રીશ્રીએ જણાવ્યું કે આ દિવ્ય બુધ્ધમંદિર માત્ર પ્રાર્થના તીર્થ નહીં પરંતુ, બુધ્ધ ધર્મીઓ, બૌધ્ધ તત્વજ્ઞાનના ફિલસુફો માટે અધ્યયન સંશોધનનું વૈશ્વિક કેન્દ્ર બનશે જે પૂર્વ અને પશ્ચિમના ધર્મો વચ્ચેની તુલના અને મનો-વિજ્ઞાનના સંશોધનનું કેન્દ્ર બનશે.

ગુજરાતમાં, ભારતનું સૌથી ભવ્ય બુધ્ધમંદિરનું નિર્માણ કરવાનું તેમનું આ સપનું છે અને શ્રી દલાઇ લામા તેમાં પ્રેરક માર્ગદર્શન આપશે એવી અભિલાષા મુખ્યમંત્રીશ્રીએ વ્યકત કરી હતી.

ભગવાન બુધ્ધના મહાનિર્વાણ પછી તેમના પાર્થિવ દેહના અસ્થિનો પ્રાચિન કળશ ગુજરાતની દેવની મોરીની બૌધ્ધ પુરાતત્વની ભૂમિમાંથી ઉપલબ્ધ કરીને ગુજરાત સરકારે વિશ્વ સમક્ષ પહેલીવાર પ્રસ્તુત કર્યો છે એમ ગૌરવપૂર્વક મુખ્યમંત્રીશ્રીએ જણાવ્યું હતું.

ગુજરાત સરકાર અને મહારાજા સયાજીરાવ યુનિવર્સિટીના ઉપક્રમે આજથી વડોદરામાં બૌધ્ધ ધર્મની વિરાસત વિષયક આંતરરાષ્ટ્રીય સેમિનારનો પ્રારંભ મુખ્યમંત્રીશ્રીની ઉપસ્થિતિમાં મહામહિમ શ્રીયુત દલાઇ લામાએ દીપ પ્રાગટયથી કર્યો હતો. વેદાન્તાચાર્ય સ્વામી દયાનંદ સરસ્વતી, ભૂતાનના મંત્રી શ્રીયુત લોનપ્પો યાશી ઝિમ્બા, મહાબોધી સોસાયટી ઓફ ઇન્ડિયાના પ્રમુખશ્રી ભૂપેન્દ્રકુમાર મોદી સહિત દેશ-વિદેશના બૌધ્ધ ધર્મના લામાઓ અને સંશોધકો-નિષ્ણાતોની હાજરીમાં ત્રણ દિવસ સુધી વડોદરામાં બૌધ્ધ ધર્મના વિવિધ પાસાંઓ ઉપર ચર્ચા સત્રો યોજાશે. ત્રણ દિવસમાં ૪૮૦ નિબંધ-અભ્યાસ રજૂ કરવા માટે ૧૪ દેશોમાંથી બૌધ્ધ ધર્મના સ્કોલર્સ-ચિન્તકો ભાગ લઇ રહ્યા છે.

ગુજરાત બૌધ્ધ સંસ્કૃતિનો વૈભવ વારસો ધરાવે છે અને દેવની મોરી, વડનગર, જૂનાગઢ, ગિરનાર, કચ્છ અને ભરૂચ સહિતના પ્રદેશોમાં ભગવાન બુધ્ધના જીવનકાળ પર્યંતથી બૌધ્ધ ધર્મનો પ્રભાવ હતો તેની ભૂમિકા આપી નરેન્દ્રભાઇ મોદીએ જણાવ્યું કે ગુજરાતની ધરતી ઉપર બૌધ્ધ ધર્મના ઐતિહાસિક અવશેષોનું સંશોધન અને વિકાસ-અધ્યયન કરવા માટે રાજ્ય સરકાર વિશ્વના સ્કોલર્સ-સંશોધનકાર, ઇતિહાસકારોનો સહયોગ લેવા તત્પર છે.

બૌધ્ધ ધર્મના વૈશ્વિક નકશામાં ગુજરાતે પોતાનું ગરિમામય સ્થાન અંકિત કર્યું છે તેનો નિર્દેશ આપતાં શ્રી નરેન્દ્રભાઇ મોદીએ જણાવ્યું કે ચીની યાત્રી-ઇતિહાસકાર શ્રી હયુએન ત્સંગે ગુજરાતમાં બૌધ્ધ ધર્મના પ્રભાવ માટે સૌથી વધુ પરિભ્રમણ કરીને વડનગર અને વલ્લભી બૌધ્ધ વિશ્વ વિદ્યાપીઠના બૌધ્ધ ધર્મના શિક્ષણ-અધ્યયન માટેની ગુજરાતની વિરાસતની પ્રસંશા કરી હતી. ગુજરાત, માત્ર ભારત જ નહીં, વિશ્વની બુધ્ધિષ્ટ ટુરિષ્ટ પિલગ્રીમેજ સર્કિટમાં જોડાવા આતુર છે એમ મુખ્યમંત્રીશ્રીએ જણાવ્યું હતું.

મુખ્યમંત્રીશ્રીએ બૌધ્ધ તત્વજ્ઞાન અને હિન્દુસંસ્કૃતિની ફિલસૂફી વચ્ચેની સામ્યતા અને ભિન્નતાનું તુલનાત્મક અધ્યયન કરવા ચિન્તકો-દાર્શનિકોને ઇજન આપ્યું હતું.

ભગવાન બુધ્ધના જીવન આદર્શો અને તત્વજ્ઞાન આજે પણ વિશ્વ માટે પ્રસ્તુત છે તેની વિષદ ભૂમિકા આપતાં મુખ્યમંત્રીશ્રીએ જણાવ્યું કે વિશ્વ માનવ-માનવ વચ્ચેના સંબંધો અને સંઘર્ષમય હિતોના કારણે અશાંતિ અને સંકટોથી ઘેરાયેલું છે ત્યારે, બૌધ્ધ અને હિન્દુ ધર્મ સંસ્કૃતિના આદર્શ-મૂલ્યો વૈશ્વિક જવાબદાયિત્વ, પ્રેમ, સહિષ્ણુતા અને કરૂણા સાથે માનવ-માનવ વચ્ચેનાં સંબંધોને માનવીયતાનું પરિમાણ બક્ષે છે. કલાઇમેટ ચેંજનું સંકટ હોય ત્યાં પ્રકૃતિ સાથેના સહઅસ્તિત્વ અને હિંસક ભોગવાદ, આતંકવાદ જેવી વિકૃતિ-માનસિકતામાંથી માનવજાતને ઉગારવા અહિંસાનું તત્વજ્ઞાન બૌધ્ધ ધર્મમાંથી મળે છે. એ જ રીતે, ભગવાન બુધ્ધના ચાર ઉમદા સત્યો માનવીની પીડા-દુઃખ અને વ્યથાનું નિવારણ કરી શકે છે અને ગરીબી, શોષણમાંથી મૂકિત મેળવવા તથા ક્રોધ-લોભ-મોહ જેવી માનવ મનની નબળાઇઓનું સમાધાન બૌધ્ધ ધર્મમાં મળે છે એમ તેમણે જણાવ્યું હતું.

ગુજરાતમાં મહાન બૌધ્ધિ-દાર્શનિકોએ પોતાનું જીવન બૌધ્ધ તત્વજ્ઞાન માટે સમર્પિત કર્યું હતું અને પુરાતન વલ્લભી બૌધ્ધ વિશ્વ વિદ્યાપીઠમાં દુનિયાભરના વિદ્યાર્થીઓ બુધ્ધ-અધ્યયન માટે આવતા હતા તેનો ઉલ્લેખ કરી શ્રી નરેન્દ્રભાઇ મોદીએ ગિરનારમાં સદીઓથી વસેલા સિંહની પ્રજાતિ, સમ્રાટ અશોકના જૂનાગઢમાં શિલાલેખ અને ભારતની રાજચિન્હ મૂદામાં ત્રણ ચિન્હોની પ્રતિકૃતિ આ બધામાં કોઇ અનુસંધાન છે કે કેમ તેનું સંશોધન કરવા તેમણે આહ્વાન કર્યું હતું.

પૂર્વના હિન્દુ, બુધ્ધ, જૈન ધર્મો, મેડિટેશન અને માનવીને ભગવાન બનવાની દિશા બતાવીને ક્ષમતા આપે છે જ્યારે પશ્ચિમના ધર્મોની વિચારધારા આનાથી વિપરીત છે, એમ તેમણે ઉમેર્યું હતું.

ગુજરાતને બુધ્ધિસ્ટ ટુરિસ્ટ હેરિટેજ ડેસ્ટીનેશન બનાવવાની નેમ વ્યકત કરતાં શ્રી નરેન્દ્રભાઇ મોદીએ વડોદરા યુનિવર્સિટી સેન્ટર ઓફ રિલીજીયન્સ સ્ટડી શરૂ કરશે એમ જાહેર કર્યું હતું.

સ્વામી દયાનંદજી

સ્વામી દયાનંદ સરસ્વતીજીએ હિન્દુ ધર્મ સંસ્કૃતિની વૈશ્વિક મૂલ્યોની ભૂમિકા સાથે ભગવાન બુધ્ધના અહિંસાના જીવનદર્શનની સામ્યતાનો ઉલ્લેખ કર્યો હતો. માનવજાતના અસ્તિત્વ સાથે, સકલ જીવસૃષ્ટિનું સહઅસ્તિત્વ જોડાયેલું છે એ આપણી સંસ્કૃતિનું સનાતન મૂલ્ય છે, એમ તેમણે જણાવ્યું હતું.

‘‘અહિંસા પરમો ધર્મ-’’એ હિન્દુ વેદાન્તનો મંત્ર છે અને બૌધ્ધધર્મનું તત્વજ્ઞાન છે, બુધ્ધ એ કોઇ સીમામાં બંધાયેલો નથી એ સમસ્ત માનવમનને બૌધ્ધિક સંપદા આપે છે એમ જણાવી સ્વામી દયાનંદજીએ ગુજરાતમાં શ્રી નરેન્દ્રભાઇ મોદીના સક્ષમ નેતૃત્વને પ્રેરણારૂપ ગણાવ્યું હતું. એમની ઇચ્છાશકિતથી જ, ગુજરાત વિકાસના ધર્મ-માર્ગ ઉપર આગળ વધતું રહેશે એવો વિશ્વાસ તેમણે વ્યકત કર્યો હતો
 
ગુજરાત માહિતી બ્યુરો, ગુજરાત સરકાર

મુખ્યમંત્રી શ્રી નરેન્દ્રભાઇ મોદીએ સ્ટેનલેસ સ્ટીલના આંતરરાષ્ટ્રીય પ્રદર્શન ઇન્ડીનોક્ષઃ૨૦૧૦નું આજે અમદાવાદમાં ઉદ્ઘાટન કરતાં યુવાનો માટે શારિરીક સ્વાસ્થ્યના જીમ-ઇકવીપમેન્ટ અને બાળકો માટે ક્રિડાંગણોમાં સ્ટીલના ખેલખૂદના સંસાધનોના સ્ટીલ મેન્યુફેકચરીંગ ઇન્ડસ્ટ્રીઝ ગુજરાતમાં વિકસાવવા આમંત્રણ આપ્યું હતું. આ હેતુસર રાજ્ય સરકાર વિશેષ પ્રોત્સાહક નીતિ બનાવવા તત્પર છે એમ તેમણે જણાવ્યું હતું.

સ્ટેનલેસ સ્ટીલ ઉદ્યોગના સૌથી મોટા આ આંતરારાષ્ટ્રીય સ્ટીલ ફેરનું ભારતમાં પહેલીવાર આયોજન કરવામાં આવ્યું છે. દેશ-વિદેશના ૫૦૦થી વધુ સ્ટીલ ઉદ્યોગકારોને એક સીંગલ પ્લેટફોર્મ ઈન્ડીનોક્ષઃ૨૦૧૦ દ્વારા ઉપલબ્ધ થયું છે. જે ૧૯મી જાન્યુઆરી સુધી ખૂલ્લો રહેશે.

મુખ્યમંત્રીશ્રીએ ગુજરાત સ્ટીલ ઉદ્યોગમાં જ નહીં વિકાસની નવી ઉંચાઇઓ પાર કરી રહ્યું છે અને રાષ્ટ્રીય-આંતરારાષ્ટ્રીય સ્તરના સેમિનારોનું પણ આકર્ષણનું કેન્દ્ર બની ગયું છે તેની ભૂમિકા આપતાં જણાવ્યું કે ગુજરાતે વ્યાપાર-ઉદ્યોગ અને વિકાસની સંભાવનાઓ માટે વિશ્વાસનું વાતાવરણ ઉભૂં કર્યું છે.

છેલ્લા છ મહિનામાં જ ગજરાતમાં પ્રતિદિન બે-ત્રણ ઔદ્યોગિક એકમોની સ્થાપના અને વિસ્તરણ પ્લાન્ટ લગાતાર કાર્યરત થયા છે અને ગુજરાતમાં ઇન્ફ્રાસ્ટ્રકચર, સ્કીલ્ડ મેનપાવર, પ્રોએકટીવ પોલીસી, એનર્જુ અને ગુડ ગવર્નન્સના બધા જ પ્રોત્સાહક પરિબળોએ ગુજરાતને ઇકોનોમી અને ઇન્ડસ્ટી્રઅલ ગ્રોથની આગવી ઓળખ આપી છે તેમ મુખ્યમંત્રીશ્રીએ જણાવ્યું હતું.

હેલ્થકેર અને સ્વાસ્થ્ય સંભાળ માટેની આ સાર્વત્રિક જાગૃતિને ધ્યાનમાં લઇને તેમણે જીમ-ઇકવીપમેન્ટ મેન્યુફેકચરીંગના સ્ટીલ ઇન્ડસ્ટ્રીઝની વિશાળ શકયતાઓ વિશે ગુજરાતમાં જીમ-ઈકવીપમેન્ટના સ્ટીલ મેન્યુફેકચરીંગના સ્ટીલ ઇન્ડસ્ટ્રીઝની વિશાળ શકયતાઓ વિશે ગુજરાતમાં જીમ-ઇકવીપમેન્ટના સ્ટીલ મેન્યુફેકચરીંગ એકમો સ્થાપવા આમંત્રણ આપ્યું હતું.

વિશેષમાં બાળકો માટે, યુવાનો માટે, ક્રિડાંગણના સ્ટીલ-આધારીત ખેલકુદના સંસાધનોના મેન્યુફેકચરીંગ ઇન્ડસ્ટ્રીઝનો ગુજરાતમાં ઘણો અવકાશ છે તે માટે પણ તેમણે આમંત્રણ આપ્યું હતું.

ગુજરાતમાં કોર આયર્ન નથી પરંતું સ્ટીલ ઉદ્યોગમાં અગ્રેસર છે, કોલસો નથી પરંતું વીજ ઉત્પાદનમાં ક્રાંતિકારી સિધ્ધિ મેળવી છે, ગુજરાતમાં પાણી નથી પરંતુ આજે ગુજરાત સમગ્ર દેશમાં કૃષિ વિકાસનો ૯.૬ ટકા કૃષિ વિકાસદર સાતત્યપૂર્વક જાળવીને ખેતીવાડી ક્ષેત્રે પ્રથમ સ્થાને પહોંચી ગયું છે તેમ તેમણે જણાવ્યું હતું.

ગ્લોબલ ઇકોનોમીના આ સ્પર્ધાત્મક યુગમાં ગુજરાતે છેલ્લા ૨૦૦ વર્ષમાં જેટલો વિકાસ સાધ્યો છે તેના કરતા વધુ વિકાસ આગામી ૨૦ વર્ષમાં ગુજરાતકારો દિલ્હી-મુંબઇ ઇન્ડસ્ટ્રીયલ કોરિડોરથી વિકાસની હરણફાળ ભરશે જે બંદર વિકાસ સંલગ્ન પ્રગતિથી સમૃધ્ધિના નવા દ્વારા ખોલશે એમ તેમણે જણાવ્યું હતું.

સ્ટીલ ઉદ્યોગ માટે તેમણે રિસર્ચ એન્ડ ડેવલપમેન્ટ ઉપર ધ્યાન કેન્‍દ્રીત કરીને ભારત જેવા ૧૦૦ કરોડના વિરાટ જનશકિતનો વિકાસ માટે વિનિયોગ કરવા અનુરોધ કર્યો હતો.

કન્યા કેળવણી નિધિ માટે મુખ્યમંત્રી શ્રી નરેન્દ્રભાઇ મોદીને ઇન્ડીયન સ્ટેનલેસ સ્ટીલ ડેવલેપમેન્ટ ઓર્ગેનાઇઝેશન દ્વારા રૂા.૧૧ લાખનો ચેક સંસ્થાના ચેરમેન શ્રી ઉગમરાજ હુંડિયા દ્વારા એનાયત કરવામાં આવ્યો હતો.

મુખ્યમંત્રી શ્રી નરેન્દ્રભાઇ મોદીએ આતંર રાષ્ટ્રીય સ્ટેનલેસ સ્ટીલ ફેરમાં ઉભા કરાયેલ પ્રદર્શનની પણ મુલાકાત લીધી હતી.

ઇન્ડીયન સ્ટેનલેસ સ્ટીલ ડેવલપમેન્ટ ઓર્ગેનાઇઝેશનના ચેરમેન શ્રી ઉગમરાજજી હુંડીયાએ આ આંતરરાષ્ટ્રીય ફેરને સ્ટેનલેસ સ્ટીલના મહાકુંભ તરીકે ગણાવ્યો હતો અને જણાવ્યું હતું કે, તેનાથી નાનામાં નાના ઉત્પાદકને આ ક્ષેત્રના રાષ્ટ્રિય મંચ ઉપર એકત્ર થવાની તક પ્રાપ્ત થઇ છે.

શાહ એલોઇઝના મેનેજુંગ ડિરેકટર શ્રી રાજેન્દ્રભાઇ શાહે સ્વાગત પ્રવચનમાં જણાવ્યું હતું કે, ભારતના ઇતિહાસમાં સ્ટેનલેસ સ્ટીલના ઉત્પાદકોનું આ પ્રથમ અને ઐતિહાસિક પ્રદર્શન સહ અધિવેશન યોજાયું છે. એકબીજાની ટેકનોલોજીનો વિનિયોગ કરીને ભારત આ ઉદ્યોગની વૈશ્વિક સ્પર્ધાનો સામનો કરી આગળ વધી શકે તેવા સંજોગોનો લાભ લેવો જોઇએ.

સ્ટીલ ઓથોરીટી ઓફ ઇન્ડિયાના ચેરમેન શ્રી એસ.કે.રૂંગરાએ સમારંભના અતિથિ વિશેષ પદેથી ગુજરાતને દેશનું ઝડપથી વૃધ્ધિ પામતું મોડેલ અને ડાયનેમીક સ્ટેટ ગણાવીને જણાવ્યું હતું કે, સ્ટેનલેસસ્ટીના ઉદ્યોગમાં આપણે ૭મા ક્રમે અને વપરાશમાં પાંચમાક્રમે છીએ પરંતુ ભારત સન ૨૦૧૫-૧૬ના વર્ષ સુધીમાં સૌથી વધુ સ્ટીલ ઉત્પાદન કરતા દેશોમાં ત્રીજા ક્રમે પહોંચી શકશે. કોસ્ટ ઇફેકટીવ અને વેલ્યુ એડીશન દ્વારા આપણે વૈશ્વિક બજારમાં ચીન જેવા દેશની સ્પર્ધા કરવામાં શકિતમાન બની શકીશું તેવો વિશ્વાસ તેમણે વ્યકત કર્યો હતો.

જિન્દાલ સ્ટીલ લિમિટેડના શ્રી રતનજી જિન્દાલે ગુજરાતને ઇન્ડસ્ટ્રીયલ ફ્રેન્ડલી સ્ટેટ ગણાવીને શ્રી નરેન્દ્રભાઇમોદીને રાજ્યના શ્રેષ્ઠ સી.ઇ.ઓ તરીકેની કાર્ય પ્રણાલીની દેશમાં જ નહિ, વેશ્વિક સ્તરે થઇ રહેલી પ્રસંશાનો ઉલ્લેખ કરી જણાવ્યું હતું કે, ગુજરાત સ્ટેનલેસ સ્ટીલના ઉદ્યોગમાં ફોકસ સ્ટેટ તરીકે નામના મેળવી છે. અમારી કંપની ગુજરાતમાં બે મોટા સર્વિસ સેન્ટર શરૂ કરશે. હિન્દુસ્તાન એક બે વર્ષમાં વિશ્વનો ત્રીજો સૌથી વધુ વપરાશ કરતો દેશ બની જશે.

ફેરના ઉદ્ઘાટન પ્રસંગે તિરૂપતિથી આવેલા સ્વામી શ્રી ગુરૂવંદનજી ઉપરાંત સંસ્થાના હોદ્દેદારો, દેશ અને દુનિયામાંથી આવેલા સ્ટેનલેસ સ્ટીલના ઉત્પાદકો, વેપારીઓ વગેરે ઉપસ્થિત રહ્યા હતા.
ગુજરાત માહિતી બ્યુરો, ગુજરાત સરકાર

મુખ્ય મંત્રીશ્રી નરેન્દ્રભાઇ મોદીએ જણાવ્યું છે કે ગરીબને દેવાના ડુંગરમાંથી મૂકત કરવા આ ગરીબ કલ્યાણ મેળો છે. ગરીબને મૂસીબતમાંથી બહાર લાવવા સરકારી મદદરૂપે તેના હક્કો હાથમાં મૂકયા છે અને હવે આ સરકાર ગરીબને ગરીબી સામે લડવા શકિતશાળી જોવા માંગે છે.

તેમણે જણાવ્યું કે ‘‘દરેક જિલ્લામાં ગરીબ કલ્યાણ મેળામાં એકંદરે જે કરોડો રૂપિયા સીધા ગરીબ કલ્યાણ મેળા થકી ગરીબના હાથમાં આવશે ત્યારે જિલ્લે-જિલ્લે તેનો પ્રભાવ અર્થતંત્ર ઉપર વિધેયાત્મક રીતે પડવાનો છે''

ગરીબી સામે લડવા માટે ગરીબને નવી શકિત આપનારા મુખ્યમંત્રીશ્રી પ્રેરિત ગરીબ કલ્યાણ મેળાની પ૦ શ્રેણીનો આજે સાબરકાંઠા જિલ્લ્લામાં બીજો રાઉન્ડ મોડાસામાં યોજાયો હતો જેમાં મોડાસા, બાયડ, ધનસુરા, માલપુર, મેઘરજ અને તલોદ તાલુકાઓમાંથી હક્કનું મેળવવાપાત્ર ૪૮ર૯૦ લાભાર્થીઓને રૂ. ૩ર.પ૦ કરોડના સાધન-સહાયની મદદ હાથોહાથ મુખ્યમંત્રીશ્રી અને અન્ય મંત્રીશ્રીઓએ આપી હતી.

આ પ્રસંગે મોડાસામાં માનવ મહેરામણ ઉમટયો હતો. ખૂલ્લી જીપમાં જનસમૂદાયની વિરાટ શિકતનું અભિવાદન કરતાં શ્રી નરેન્દ્રભાઇ મોદીએ જણાવ્યું કે આઝાદીના છ દાયકા વીતી ગયા અને સરકારો તથા નેતાઓ ગરીબો માટે પીડા વ્યકત કરી આંસુ સારતા રહ્યા અને ગરીબીમાંથી ઉધ્ધાર થશે એવી આશામાં ગરીબોની બે-બે પેઢી ગરીબીના ખપ્પરમાં હોમાઇ ગઇ આ સરકાર ગરીબના ચહેરા ઉપર આનંદની લકીર જોવા માંગે છે, હિન્દુસ્તાન આ સ્થિતિ લાવે કે ના લાવે, ગુજરાત સરકાર આ ગરીબીને નેસ્તનાબૂદ કરવા પ્રતિબદ્ધ છે એમ તેમણે જણાવ્યું હતું.

‘‘આ સરકારી મદદ આપવા માટે કોઇ ઉપકાર કરવા કે ઉપદેશ આપવા હું આવ્યો નથી-ગરીબમાં ગરીબી સામે લડવાની શકિતના મને દર્શન થયાં છે અને તેને મૂસીબતોમાંથી બહાર લાવીને ગરીબીમાંથી બહાર લાવવો છે એમ પણ મુખ્યમંત્રીશ્રીએ જણાવ્યું હતું. કોઇ ગરીબ દેવાદાર રહેવા નથી માંગતો પણ દેવાના ડુંગર નીચે દબાયેલો ગરીબ સરકારી મદદ લઇને હવે મહેનત પસીનો વહાવીને ગરીબી સામે લડવા શકિતમાન બનશે, એમ તેમણે જણાવ્યું હતું.''

મુખ્યમંત્રીશ્રીએ જણાવ્યું કે ગરીબ કલ્યાણ મેળાના બંને રાઉન્ડ સાબરકાંઠાએ પૂરા કર્યા છે અને હિંમતનગર તથા મોડાસામાં થઇને જિલ્લાના કુલ એક લાખ કરતાં વધારે ગરીબી રેખા નીચે જીવતા કુટુંબોને એકંદરે રૂ. ૧૦૦ કરોડથી વધુ સરકારી યોજનાના નાણાંકીય લાભો સહાયરૂપે મળ્યા છે.

આ બધા જ નાણાં ગરીબના ઘરમાં જશે અને ગરીબની તાકાત વધશે તો તેનો પ્રભાવ સમગ્ર સાબરકાંઠાના અર્થતંત્ર અને આર્થિક પ્રવૃત્તિ ઉપર પડશે એમ પણ તેમણે જણાવ્યું હતું.

શ્રી નરેન્દ્રભાઇ મોદીએ જણાવ્યું કે ભૂતકાળમાં ગરીબના નામે મતોના રાજકારણથી ચૂંટણી આવે ત્યારે ગરીબોના મેળા યોજીને વચનોની લહાણી થતી, સરકારની યોજનાઓ, બજેટો, જાહેરાત થતી અને ગરીબ સુધી તેનો પૂણ્યપ્રવાહ કયારેય પહોંચતો જ નહીં. આ રાજકારણનું ધુપ્પલ મીટાવી દેવા, ગરીબના હક્કનું છીનવી લેનારા વચેટીયાને સીધા દોર કરવા અને ગરીબોનું લૂંટનારી કટકી કંપનીનો ખાત્મો બોલાવી દેવા આ સરકારે લાલ આંખ કરીને ગરીબ કલ્યાણ મેળા થકી ત્રીજું નેત્ર ખોલ્યું છે એમ તેમણે આક્રોશપૂર્વક જણાવ્યું હતું.

‘‘હવે કોઇ વચેટીયો ગરીબ પાસે જઇને તેના હક્કનું પડાવી લેવાનો પેંતરો કરે કે કોઇ લાભાર્થીને હલકી વસ્તુ-સાધન સહાયરૂપે મળે તો તેની ફરિયાદ એક પોસ્ટકાર્ડ લખીને મુખ્યમંત્રીશ્રીને, ગાંધીનગર મોકલજો, અમે આવા તત્વોને સીધાદોર કરી દઇશું'' શ્રી નરેન્દ્રભાઇ મોદીએ આ ગરીબને આર્થિક પ્રવૃત્તિમાં સક્ષમ બનાવવા માત્ર સહાય નહીં, તાલીમ, શિક્ષણ, સાધનો આપીને વ્યવસ્થામાં પગભર બનાવ્યો છે તેની અનેકવિધ સંકલિત યોજનાઓની વિગતો આપી હતી.

આખા ગુજરાતમાં એક લાખ જેટલા સખીમંડળોમાં લાખો ગ્રામનારી ગૃહિણીઓ આર્થિક પ્રવૃત્તિમાં નેતૃત્વ લઇને વર્ષે રૂ. ૪૦૦ કરોડનું નાણાંકીય સંચાલન કરતી થઇ છે એમ મુખ્યમંત્રીશ્રીએ જણાવ્યું હતું.

ગરીબની બેલી આ સરકારે જન્મથી મરણ સુધી તેની પડખે ઉભા રહેવાની વ્યવસ્થા કરી છે. માંદગી, રોગ, પ્રસૂતિ, કુપોષણથી પીડાતા ગરીબ પરિવારમાં સહાય કરવા આ સરકાર રાત-દિવસ ચિન્તા કરી રહી છે. ગરીબી સામે લડવાની દ્રષ્ટિ આ સરકારે આપી છે એમ તેમણે જણાવ્યું હતું.

મુખ્યમંત્રીશ્રીએ જણાવ્યું કે ગરીબને આ સરકાર આત્મવિશ્વાસ આપવા માંગે છે. ગરીબોને શકિત આપે છે ત્યારે મોંઘવારીએ કાળો કેર સર્જ્યો છે. ગરીબની આંતરડી કકળાવીને કોઇ સુખી રહેવાનું નથી એ વાત કેન્દ્રની સરકાર સમજે અને દેશની જનતા એ માટે સબક શીખવાડે એવી અપેક્ષા તેમણે વ્યકત કરી હતી.

મહેસૂલ મંત્રી શ્રીમતી આનંદીબેન પટેલે જણાવ્યું હતું કે, વચેટીઆઓને દૂર કરીને ગરીબોને સીધા લાભ મળે તેવા આશયથી આ ગરીબ કલ્યાણ મેળાઓનું આયોજન હાથ ધરાયું છે. ગરીબોને પ્લોટ-આવાસથી માંડીને તેમના જીવન ઉત્કર્ષ માટે સંખ્યાબંધ યોજનાઓ આ સરકારે અમલી બનાવી છે. વિધવા બહેનો-ગરીબ બહેનો પગભર થઇ શકે તેવી યોજના અમલી બનાવી છે. અત્યાર સુધી ૪૦ હજાર વિધવા બહેનોને તાલીમ તથા સાધન-સહાય આપીને પગભર બનાવાઇ છે. મહિલાઓ સ્વાભિમાનપૂર્વક જીવી શકે, ગરીબ બાળકો સારૂં શિક્ષણ મેળવી શકે તે માટે પણ કામગીરી હાથ ધરાઇ છે. મહિલાઓની બચત પ્રવૃત્તિને પ્રોત્સાહન આપી સખીમંડળોની રચના કરાઇ છે. રાજ્યમાં ૧.૪ર લાખ સખીમંડળો બનાવી રૂ. ૩૦૦ કરોડથી વધુ રકમ અપાઇ છે જેના દ્વારા મહિલાઓ સ્વનિર્ભર બની છે. ચિરંજીવી યોજના અમલી બનાવી રાજ્યમાં ર.પ લાખ સંસ્થાકીય પ્રસુતિ કરાવીને માતા-બાળ મૃત્યુ દર ઘટાડવાનું પ્રશંસનીય કામ આ સરકારે કર્યું છે, એમ તેમણે ઉમેર્યું હતું.

જિલ્લાના પ્રભારી અને આદિજાતિ વિકાસ રાજ્યમંત્રીશ્રી જશવંતસિંહ ભાભોરે જણાવ્યું હતું કે, જિલ્લામા ૧૩ લાખ લિટર પ્રતિદિન દૂધ એકત્રીકરણ થાય છે. જિલ્લામાં પાકતા ફુલો વિદેશમાં જાય છે. જિલ્લાનો સામાજિક-આર્થિક-ઔદ્યોગિક વિકાસ થાય તેવો અભિગમ રાજ્ય સરકારે રાખ્યો છે. અગાઉની સરકારોએ કુલ ૧ર,પ૦૦ કરોડ રૂ. આદિવાસીઓ માટે ફાળવ્યા છે. જ્યારે આ સરકારે રૂ. ૧પ હજાર કરોડ માત્ર પાંચ વર્ષમાં ફાળવ્યા છે. જિલ્લાને સુજલામ સુફલામ યોજના હેઠળ લાભ મળે તેવા પ્રયાસો કર્યા છે. તેમણે ગરીબોને ગરીબીમાંથી મુકત કરવાનો સેવા યજ્ઞ આ સરકારે હાથ ધર્યો છે એમ તેમણે ઉમેર્યું હતું.

શિક્ષણ રાજ્યમંત્રીશ્રી જયસિંહ ચૌહાણે જણાવ્યું કે, ગુજરાત સરકાર સાચા અર્થમાં ગરીબોની બેલી પૂરવાર થઇ છે. રાજ્યના તમામ બાળકો શિક્ષણ મેળવે-કન્યા કેળવણી વ્યાપક બને-કોમ્પ્યુટરનું જ્ઞાન વધે-ટેકનિકલ શિક્ષણ વધે અને યુવાનોને રોજગારી મળે તે માટે અગાઉ શિક્ષણના બજેટમાં રૂ. ૧૩૬૬ કરોડથી વધારીને વર્ષે ર૦૦૯-૧૦માં રૂ. ૧૬૦૦ કરોડની જોગવાઇ કરી છે. ડ્રોપઆઉટ રેશીયો ઘટયો છે. તમામ શાળાઓમાં કોમ્પ્યુટર, શાળાના બાળકોને મફત પુસ્તકો જેવી યોજનાઓ અમલી બનાવાઇ છે. રાજ્યના ૩૦ વિકાસશીલ તાલુકામાં રહેતી અને તબીબી અભ્યાસક્રમમાં ભણતી દીકરીઓને વિશેષ સુવિધા અપાય છે.

સાબરકાંઠાના સાંસદ ર્ડા. મહેન્દ્રસિંહ ચૌહાણે જણાવ્યું હતું કે, ગરીબો પ્રત્યેની સંવેદનામાંથી ગરીબ કલ્યાણ મેળાનો જન્મ થયો છે. આઝાદીના આટલા બધા વર્ષો પછી દેશમાં સમાજવાદ-રામરાજ્ય સ્થપાશે તેવી કલ્પના સાકાર થઇ નહીં. દેશમાં પ્રતિદિન રૂ. ર૦/- મેળવનારો બહોળો વર્ગ છે ત્યારે ગુજરાતમાં ગરીબોના ઘરમાં કલ્યાણ દીપ પ્રજવલિત થાય તેવો આ મેળાનો આશય છે. એમ તેમણે ઉમેર્યું હતું. જિલ્લાની ઉદ્યોગ અને સિંચાઇની અપેક્ષા સંતોષવા ગુજરાત સરકારે હાથ ધરેલા પ્રયાસોને તેમણે બિરદાવ્યા હતા.

મુખ્યમંત્રીશ્રીએ આરોગ્ય, ડાયરી કેલેન્ડરનું વિમોચન પણ આ પ્રસંગે કર્યું હતું.

મોડાસાના ધારાસભ્યશ્રી દીલીપસિંહ પરમારે સ્વાગત પ્રવચનમાં ગરીબ કલ્યાણ મેળાનો ઉદેશ સમજાવતા જણાવ્યું હતું કે ગરીબોને તેમના હક્ક હાથોહાથ આપવા માટે આ મેળો યોજાય છે. તેમણે જિલ્લામાં હાથ ધરાયેલા વિકાસ-કલ્યાણ કામોની રૂપરેખા આપી હતી.

શહેરી વિકાસ મંત્રીશ્રી નિતીનભાઇ પટેલ, સામાજિક ન્યાય અને અધિકારીતા મંત્રીશ્રી ફકીરભાઇ વાઘેલા, આરોગ્યમંત્રીશ્રી જયનારાયણભાઇ વ્યાસ, શ્રી પરબતભાઇ પટેલ, ધારાસભ્યો સર્વશ્રી પ્રફુલભાઇ પટેલ, ઉદેસિંહ ઝાલા, જિલ્લા પંચાયતના પ્રુમખશ્રી વસ્તાભાઇ મકવાણા, જિલ્લા ભાજપા પ્રમુખશ્રી પૃથ્વીરાજભાઇ પટેલ, વિવિધ નગરપાલિકાઓના પ્રમુખશ્રીઓ અન્ય પદાધિકારીઓ-અગ્રણીઓ વગેરે મોટીસંખ્યામાં ઉપસ્થિત રહ્યા હતા.

morpinch1